Xəbər verdiyimiz kimi, sentyabrın 9-dan 11-dək Bakıda Beynəlxalq Türk Akademiyası və Türk Dil Qurumu tərəfindən təşkil olunan “Türk Dünyası Ortaq Əlifba Komissiyası”nın üçüncü iclası öz işini uğurla başa çatdırıb.

Müzakirələr nəticəsində 34 hərfdən ibarət Ortaq Türk Əlifbası üzərində ümumi razılıq əldə olunub.

Mövzu ilə bağlı açıqlama verən deputat Ceyhun Məmmədovun sözlərinə görə, bu tədbirin keçirilməsi böyük əhəmiyyət kəsb edir:

“Bu gün biz ümumiyyətlə həm regionda, həm də dünyada çox ciddi proseslərin getdiyini müşahidə edirik. Türk dövlətləri hazırkı şəraitdə birləşməsələr və birgə əməkdaşlığı gücləndirməsələr növbəti illərdə bir çox ciddi çətinliklərlə üz-üzə gələ bilərdik. Ona görə də hazırda inteqrasiyanın sürətləndirilməsi və əlaqələrin gücləndirilməsi üçün yeni imkanlar yaranıb. Biz də həmin imkanlardan istifadə etməliyik.

Əlifba ilə bağlı məsələ çox önəmlidir. Hesab edirəm ki, bu istiqamətdə addımların atılması çox sevindiricidir və müəyyən məsələlər barədə artıq razılığa gəlinib. Düşünürəm ki, burada sadəcə mövzuya birtərəfli baxmalı deyilik. Yəni Türk dövlətlərinin birliyi və həmrəyliyi onların milli dəyərlərinin, ənənələrinin qorunmasına xidmət etməlidir”.

C.Məmmədov qeyd edib ki, başqa dillərdən gələn sözlərdən imtina etməliyik:

“Türk dili ilə bağlı hesab edirəm ki, ortaq dili seçərkən bu gün ortaq dilə ,yəni Osmanlı dilinə yaxın olan Azərbaycan türkcəsi seçilməlidir. Ona görə də digər dillərdən gələn sözlərdən imtina etməliyik. Bu baxımdan tarixilik qorunmalıdır. Başqa bir məsələ isə bu gün Türkiyə-Azərbaycan Universiteti fəaliyyətə başlayır. Ona görə də düşünürəm ki, ayrıca bir türk dövlətlərinin universitetinin yaradılması yaxşı olardı.
Elə ən uyğun yerdə- Azərbaycanda həmin universitetinin yaradılması məqsədəuyğun olar. Çünki Azərbaycan Orta Asiya ilə Türkiyə arasında bir körpüdür. Biz birgə türk dövlətləri universitetini yarada bilərik.

Belə ki, burada hər ölkədən alimlər çalışa bilər. Eyni zamanda hər ölkədən müəyyən sayda tələbə qəbul edə bilərik. Bu da bizim birliyimizi və əməkdaşlığımızı daha da gücləndirəcək.

Yəni bu gün biz bütün sahələrdə əməkdaşlıq etməliyik. Bunun da ən münbit yerlərindən biri ali məktəblərdir. O mənada Azərbaycanda bir ali məktəb yaradaraq türk dövlətlərinin hər birindən məsələn 500, 1000 tələbə qəbul etməklə rotasiya şəklində 5 ildən bir rektorlar dəyişdirilə bilər. Məsələn 5 il Türkiyədən gələn, 5 il Azərbaycandan, 5 il digər respublikadan rektorlar dəvət edilsə, yaxşı olar. Düşünürəm ki, bu məsələ öz müsbət töhfəsini verəcək”.