Paytaxtdakı 53 nömrəli tam orta məktəbdə ilk dərs gününə həsr olunmuş tədbir keçirilib.

Tədbir Dövlət Himninin səsləndirilməsi və Vətən şəhidlərinin əziz xatirəsinin bir dəqiqəlik sükutla yad edilməsi ilə başlayıb.

Yeni tədris ilinin fəaliyyəti münasibətiylə Elm və Təhsil nazirinin müavini İdris İsayev jurnalistlərə açıqlama verib.

Nazir müavini bildirib ki, bu gün əlamətdar gündür və təhsil bayramıdır:

“Ölkəmizin ümumi təhsil müəssisələrində 133 mindən artıq şagird 1-ci sinfə gedəcək. Təbii ki, onlar üçün əlamətdar gün hesab edilir. Bu il ilk dəfə Xankəndi, Şuşa və Xocalı şəhərində, eləcə də Laçın rayonunun Sus kəndində məktəb zəngi çalınır.

Bütövlükdə işğaldan azad olunmuş ərazilərdə 9 ümumi təhsil müəssisəsində tədris həyata keçiriləcək. Bu məkəblərdə 1410 şagirdimiz təhsil alacaq. Onlardan 149-u I sinfə gedən uşaqlardır. Ümumiyyətlə hesab edirəm ki, bu gün xüsusilədə I-lər üçün əhəmiyyətli gündür. Onlar ilk dəfə məktəb həyatına qədəm qoyacaq, sinif yoldaşları və müəllimləri ilə tanış olacaqlar.

Təhsil cəmiyyətimizin inkişafının əsasını təşkil edir. Bu barədə Ulu öndər Heydər Əliyev dəfələrlə çıxışlarında qeyd edib. Elə bir ölkə yoxdur ki, orada təhsilə diqqət olmasın. Ölkəmizdə belə ölkələr sırasına daxildir. Azərbaycan Respublikasının Prezidenti və Birinci vitse-prezidenti Mehriban xanım Əliyevanın diqqəti və qayğısı nəticəsində təhsil sahəsində aparılan islahatlar Ulu öndər Heydər Əliyevin apardığı təhsil siyasətinin davamlı göstəricisidir”.

İ.İsayev bildirib ki, bu il 6 minə yaxın müəllim ilk dəfə fəaliyyətə başlayacaq:

“Azərbaycanda təhsil müəssisələrinin demək olar ki, 80%-i yenilənib. Hər il məktəblər tikilir və əsaslı təmir olunur. Bu il 29 təhsil müəssisəsi tikilib istifadəyə verilib. 83 ümumi təhsil müəssisəsi tikilməkdədir. 37 ümumi təhsil müəssisəsi layihələndirilib. 670-dən artıq məktəblər cari ildə təmir olunub.Bu il yeni müəllimlik fəaliyyətinə qədəm qoyan müəllimlərimiz var. Təxminən onların sayı 6 minə yaxındır. Həmin müəllimlər ilk dəfə olaraq müəllim fəaliyyətinə başlayacaqlar. Düşünürəm ki, onların peşəkarlıq səviyyəsinin artırılması xüsusi əhəmiyyət kəsb edir.

Təcrübə göstərir ki, o uşaqlar uğur qazanırlar ki, həmin uşaqların valideynləri bilavasitə onların təhsili ilə maraqlanıblar. Ona görə də hər bir valideyn təhsil məsəslələrinə yaxın olmalıdır”.