Son zamanlar istedadlı uşaqların nəzərə alınıb liseylərin yaradılması və bunun çox gözəl təşəbbüs olması fikirləri aşılanır. Maraqlısı budur ki, məktəblərdə fərdi təhsil düzgün formalaşdırılmır. Hətta bəzən fərdi təhsil üçün savadı uyğun olan müəllim olmur. Nə də biz olimpiyada, yarış, müsabiqədə uğur qazanan şagirdin fərdi təhsil aldığını görmürük.

Bəzi məktəblər lisey adını daşısalar da, lisey olaraq heç bir göstəricisi, təəssüf ki, yoxdur. Şagird yerdəyişməsi də imkan vermir ki, şagirdlərdən həqiqətən istedadlı olanlar məhz həmin yerdə təhsil alsın. Nə də həmin müəssisələr şagirdlərin imkanlarından asılı olmayaraq onlara şərait yaratmır. Belə bir halda həqiqətən liseylərin uğurundan ya da artırılmasının uğurundan danışmaq olarmı?

Ən əsas məsələ də liseylərə ödənişli əsaslarla qəbul olunması, "daydayın" köməyi ilə daxil olunması işi daha da qarmaşıq hala gətirir. Xüsusi test imtahanı ilə qəbulu olanlar da ayrı bir siyasət işlədirlər. Bu heç də onların şəffaf iş gördüyünü göstərmir. Əksinə həmin lisey, gimnaziyalar bir də həmin liseyə qəbul üçün fantastik qiymətlərlə hazırlıqlar keçirlər. Burda həqiqətən şəffaflıqdan danışmaq olarmı?! Bu "Mədəni soyğunçuluqdan" başqa bir şey deyil. Artıq rüşvətə qanuni adlar qoyub insanları aldatmağın yolunu rahat tapıblar. Bu yol isə yaxşı qazanc gətirdiyindən liseylərin də sayı artıb.

Övladına gözəl həyat vermək istəyən valideynlər də bu tələnin qurbanı olur. Yaxşı, lisey həqiqətən öz göstəricilərini doğrultmursa, və ya digər yollara əl atırsa, burda sizcə də bir uyğunsuzluq yoxdurmu? Bəlkə də, testlər vasitəsilə deyil, birbaşa inkişaf dinamikasına görə müxtəlif məktəblərdən yönləndirmələr olarsa, daha uğurlu olar.
Ən əsası da niyə məktəblərin uğuruna əsasən addım atmaq deyil, məhz yeni liseylər yaratmaq???