“Universitetlərin tanınmasında elmi tədqiqatların rolu böyükdür”.
Bu sözləri açıqlamasında Azərbaycan, Rusiya və Türkiyənin iqtisad elmləri doktoru, professor Zahid Məmmədov qeyd edib.

Professor Azərbaycanın ali təhsil müəssisələrində kitab evlərinin genişləndirilməsinin zamanı gəlib çatdığını vurğulayıb:

“Dünyanın bütün universitetlərində ən güclü elmi fəaliyyət onların nəşr evləri ilə ölçülür. Ali məktəbə gələn qonaqlar buraya daxil olmadan öncə universitetin kitab evi ilə tanış olurlar. Düşünürəm ki, artıq Azərbaycanın ali təhsil müəssisələrində kitab evlərinin genişləndirilməsinin zamanı gəlib çatıb.
Çünki bu gün elə tədris vəsaitləri var ki, onu hansısa universitetdə nəşr edib, lakin digər universitetlərin bundan xəbəri olmur. Ona görə də nəşriyyat evinin univeristetlərin inkişafına dəstək olmasının vaxtıdır”.

Z.Məmmədov ali məktəblərin ən yaxşı göstəricilərdən biri də nəşriyyat evlərinin gücləndirilməsini vurğulayıb:
“Eyni zamanda elmi jurnalların fəaliyyətini dəstəkləyib, tanıtmaq da lazımdır. Məsələn, Azərbaycanla bağlı kimsə nəsə axtarsa, məhz həmin nəşriyyat evində tapması çox önəmlidir. Elmi tədqiqatın nəticələri harada əks olunur desək, əlbəttə “nəşrlərdə” deyərik.
Yayımlanmayan əsər "ölü"yə bənzər. Ona görə də hər bir yaxşı tədqiqat əsəri yayımlanmalıdır. Bu tədqiqatın cəmiyyətin inkişafında çox ciddi dəstəyi olmalıdır. Ali məktəblərin inkişafında əsas göstəricilərdən biri elmi nəşrlərin genişlənməsidir.
Ali məktəblərin fəaliyyəti onların nəşrləri ilə tanınmalıdır”.