Bugündən 9 illik orta təhsil bazasında kolleclərə ixtisas seçimi başlayıb.

TehsilMedia.az xəbər verir ki, İxtisas seçiminə qəbul imtahanında topladıqları ümumi balı 50-dən, Azərbaycan dili və ya rus dili fənni üzrə balı 20-dən və riyaziyyat fənni üzrə balı 10-dan az olmayan abituriyentlər buraxılır.
Dövlət İmtahan Mərkəzinin sektor müdiri Xanlar Xanlarzadə bildirdi ki, bu il kolleclərə qəbul üçün 10700 plan yeri ayrılıb. Onun sözlərinə görə, ötən illə müqayisədə bu say çoxdur. Müsabiqədə iştirak edənlərin sayı isə 29500-ə yaxındır.
Xanlar Xanlarzadə həmçinin qeyd etdi ki, qeydiyyatdan keçməyib, lakin müsabiqə şərtlərini ödəyən abituriyentlər də nəzərə alınıb.
Qabiliyyət tələb edən ixtisaslar üzrə 1551 plan yeri ayrılıb. Bu imtahanlardan 1919 nəfər məqbul qiymət alıb.
Qeyd edək ki, 9 illik orta təhsil bazasında orta ixtisas təhsili müəssisələrində ixtisas seçimi avqustun 20-si saat 23:59-dək davam edəcək.