27 Sentyabr – Azərbaycanın şanlı salnaməsi və qəhrəmanlıq tarixidir. Bu, tarixi zəfərdir. Çünki Azərbaycan nisbətən gənc dövlət olmasına rəğmən böyük bir qələbəyə imza atdı. Bu, həm dirçəliş, həm də yüksəliş tarixi kimi yaddaşımıza həkk olundu. Məhz 2020-ci ilin 27 sentyabr tarixində Azərbaycan ordusu Ali Baş Komandan İlham Əliyevin əmri ilə əks-hücum əməliyyatlarına başladı. Beləcə, 27 sentyabrdan başlayan şanlı tarix 8 noyabrda Ermənistanın tam məğlub olması, torpaqlarımızın düşmən tapdağından azad edilməsi ilə yadda qaldı. Artıq üç ildir ki, Azərbaycan xalqı və dövləti 27 sentyabr tarixini Anım Günü kimi qeyd edir. Bu gün Respublikanın bütün idarə və müəssisələrində, təhsil ocaqlarında tədbirlər keçirilir və şəhidlərimizin əziz xatirəsi dərin ehtiramla yad edilir. TehsilMedia.az xəbər verir ki, belə tədbirlərdən biri də Xırdalan şəhər 2 nömrəli tam orta məktəbdə keçirilib. Təhsil sektorunun nümayəndələrinin, məktəbin məzun və şagirdlərinin, eləcə də valideynlərin iştirak etdiyi “Anım Günü”nə həsr olunan tədbirdə öncə şəhidlərimizin əziz xatirəsi bir dəqiqəlik sükutla yad edilib. Təhsil müəssisəsində əziz şəhidlərimizin xatirəsini əbədiləşdirmək üçün onların fotolarından ibarət guşə yaradılıb və tədbirin keçirildiyi zal Azərbaycan bayraqları ilə bəzədilib.
Tədbirdə çıxış edən Xırdalan şəhər 2 nömrəli məktəbin direktoru Gülnaz Kərimova 27 sentyabr Zəfər Tariximizdən, ordumuzun şanlı qələbəsindən söz açıb. Direktor bildirib ki, Prezident İlham Əliyevin əmri ilə başladılan əks-hücum əməliyyatları Azərbaycan ordusunun şanlı qələbəsi ilə yekunıaşdı. Beləcə Azərbaycan dünyanı həm fiziki, həm də mənəvi cəhətdəm mat etdi. Ermənistan və onun havadarlarını isə Ali Baş Komandan İlham Əliyev öz siyasəti ilə tərksilah etməyi bacardı. Bunun böyük tarixi qələbə olduğunu xatırladan direktor hazırda dünyanın nəhəng hərbi akademiyalarında Azərbaycanın müharibə taktikasının tədqiq edildiyinə diqqət çəkib. Gülnaz Kərimova şəhidlərimizin ruhu qarşısında baş əyərək Allahdanonlara rəhmət diləyib.
“Anım Günü”ndə çıxış edən təhsil işçiləri, şagird və valideynlər 27 sentyabrı tarixi zəfərə aparan yolun başlanğıcı kimi xarakterizə ediblər. İlk növbədə qələbəmizin təminatçısı olan şəhidlərimizin əziz xatirəsinin hörmətlə yad edildiyini diqqətə çatdırıblar. Şəhidlərimiz öz qanları bahasına bizim qələbəmizi təmin etdiklərini deyən çıxışçılar, bu qələbənin gələcək nəsillərin qürur mənbəyinə çevriləcəyini dilə gətiriblər.Tədbir məktəbin şagirdlərinin vətənpərvər ruhda səsləndirdikləri musiqi proqramı ilə davam etdirilib.
Müşviq Tofiqoğlu,
TehsilMedia.az