Müzəffər Ali Baş Komandan İlham Əliyevin rəhbərliyi altında Azərbaycan Silahlı Qüvvələri tərəfindən 30 ilə yaxın müddətdə işğal altında olan torpaqlarımızın azad edilməsinin 3-cü ildönümü bütün ölkə miqyasında təmtəraqlı şəkildə bayram edilib.

tehsil.media xəbər verir ki, yurdumuzun hər yerində 8 Noyabr- Zəfər Günü milli birlik, azadlıq, haqq və ədalətin bərpa edilməsi rəmzi olaraq böyük coşqu ilə qeyd edilib. Bu müqəddəs amal uğrunda qəhrəmanlıqla döyüşərək canlarını fəda edən şəhidlərimizin, döyüş meydanında sona qədər vuruşün qazi, əsgər və zabitlərimizin milli ruh və rəşadəti sayəsində Azərbaycan öz ərazi bütövlüyünü bərpa edib.
8 Noyabr Zəfər Günü və 9 Noyabr Bayraq Gününə həsr olunmuş möhtəşəm tədbirlər bütün şəhər və kəndlərimizdə rəngarəng görüntülərlə yadda qalıb. O cümlədən, Avropa Azərbaycan Məktəbində Zəfər Günü və Bayraq Gününə həsr olunmuş tədbir təşkil olunub.

Məktəbin ibtidai korpusunda bütün siniflərin iştirakı ilə Zəfər Bayramı və Bayraq Günü tədbiri keçirilib. Tədbiri giriş sözü ilə açan ibtidai təhsil pilləsinin rəhbəri Kamilla Orucova şagirdlərə bu möhtəşəm bayramların qeyd olunmasının əhəmiyyəti barədə məıumat verib. Daha sonra səhnəyə dəvət olunan məktəbin direktoru Françesko Bankini əlamətdar bayramlar münasibətilə bütün məktəb kollektivini təbrik edib və qəhrəmanlıq, azadlıq, birlik bayramı olan Zəfər Günü və Bayraq Gününün mahiyyəti haqqında fikirlərini bölüşüb.

Daha sonra Azərbaycan Respublikasının Dövlət himni səsləndirildi və vətən uğrunda canından keçən şəhidlərimizin əziz ruhu bir dəqiqəlik sükutla yad edilib. Ardınca Erkən Təlim Mərkəzinin şagirdləri və məktəblilər vətənpərvərlik, azadlıq, milli birlik, müstəqillik, qəhrəmanlıq və bayrağımıza həsr olunmuş mövzularda şeir, nəğmə ifa etdilər, rəqs və mövzu ilə bağlı müxtəlif fəaliyyətlər nümayiş etdirdilər. Şagirdlərin böyük həvəslə, vətənpərvərlik hissi ilə nümayiş etdirdikləri ifalar onların bayrağımıza, azadlığa, haqq və ədalətə qarşı olan hörmətlərinin təcəssümü idi.

Orta məktəb korpusunda təşkil olunan tədbir Azərbaycan Respublikasının Dövlət Himninin səsləndirilməsi ilə başlayıb. Ardınca Vətən uğrunda canından keçən şəhidlərimizin əziz xatirəsi bir dəqiqəlik sükutla yad edilib. Məktəbin direktoru Françesko Bankini çıxış edərək şagirdləri və məktəb əməkdaşlarını bayram münasibətilə təbrik edib və Zəfər Gününün ölkəmizin tarixində xüsusi yeri olan əhəmiyyətli tarix olduğunu vurğulayıb. Daha sonra cənab Bankini şagirdlərə tövsiyyə edərək bildirib ki, bu zəfəri və ölkəni qorumaq və ölkəni daha parlaq gələcəyə aparmaq üçün onların yaxşı təhsil alıb dövlətlərinə xidmət etməkləri lazımdır.

Daha sonra şagirdlər Zəfər Gününə həsr edilmiş vətənpərvərlik mövzusunda şeir, rəqs və səhnəciklər nümayiş etdiriblər. Direktor F. Bankini məktəbin əməkdaşları olan və I Qarabağ müharibəsində iştirak etmiş Əkbər Hüsüyev və Bəylər Eminovu səhnəyə dəvət edərək onlara xüsusi təşəkkür edib. Onlar da döyüş xatirələrini və müharibə dövrünün çətinliklərini auditoriya ilə bölüşüblər və gənclərə tövsiyyə edərək Vətən uğrunda çalışmağın, xidmət etməyin müqəddəs vəzifə olduğunu qeyd ediblər.