Bu gün Dövlət İmtahan Mərkəzində (DİM) ingilis dili, Azərbaycan dili, və informatika fənləri üzrə buraxılış və qəbul imtahanlarında istifadə edilən qiymətləndirmə tapşırıqlarının hazırlanması, ekspertizası və yoxlanılmasına dair hazırlıq kurslarının beşinci məşğələləri keçirilib.

DİM-dən "TehsilMedia.az"a bildirilib ki, hazırlıq kurslarında yalnız elektron qeydiyyatdan keçmiş, ixtisası müvafiq fənnə uyğun olan müəllimlər, metodistlər və pedaqoji profilli ali təhsil müəssisələrinin bakalavriat səviyyəsində həmin fənn üzrə təhsil alan sonuncu kurs tələbələri və magistrlər iştirak ediblər.

Hazırlıq kursları həm əyani, həm də onlayn formada keçirilib.

Moderatorlar – Azərbaycan dili fənni üzrə Saməddin İbrahimov, ingilis dili fənni üzrə Nərminə Əliyeva kurs iştirakçılarının hazırladıqları ev tapşırıqlarının müzakirəsini həyata keçiriblər. İnformatika fənni üzrə isə moderator Fikrət İbiyev “Phyton” proqramlaşdırma dilində sətir və siyahı tipli dəyişənlər haqqında təqdimatla çıxış edib.

Kurs iştirakçılarını maraqlandıran suallar cavablandırılıb.

Hazırlıq kurslarının altıncı məşğələləri 27 noyabr 2023-cü il tarixində keçiriləcək.