Azərbaycanın Vətən müharibəsində qazandığı Zəfərin 4-cü ildönümünə həsr olunmuş “Qələbə qaçışı” adlı xeyriyyə qaçışı keçiriləcək.

“Qafqazinfo” xəbər verir ki, “Qürurla irəli” şüarı ilə keçirilən qaçışa qoşulmaq istəyənlər qeydiyyat zamanı, xeyriyyə məqsədilə minimum 20 manat iştirak haqqı ödəməlidirlər.

Qaçışdan toplanan vəsait “YAŞAT” Fonduna köçürüləcək.

“Qələbə qaçışı”nın iştirakçıları Dənizkənarı Milli Parkda, “Yeddi gözəl” fəvvarəsinin yanından start götürəcəklər. Qaçış 10 km məsafəni əhatə edəcək və finişə ilk çatan iştirakçılar qalib elan edilərək mükafatlandırılacaqlar.

Qaçış çərçivəsində maraqlı və əyləncəli tədbirlər də təşkil ediləcək. Finişə çatmış bütün iştirakçılara medal təqdim ediləcək. Həmin şəxslər yarışın rəsmi saytına daxil olaraq öz iştirakçı sertifikatını da yükləyə biləcəklər.

Qaçışda iştirak üçün 18 yaşdan yuxarı şəxslər https://events.smartscoring.com/marathon linki vasitəsilə noyabrın 1-i saat 12:00-dək qeydiyyatdan keçə bilərlər.