Məktəblilərarası fənn müsabiqələri və Lütfi Zadə adına riyaziyyat-məntiq olimpiadasının final turu keçirilib.

Mayın 31-də keçirilən final turu ölkə üzrə 8 mərkəzdə təşkil olunub. Lütfi Zadə adına riyaziyyat-məntiq olimpiadasında şagirdlərə 25 qapalı, Fənn müsabiqələrində isə 15 açıq sual təqdim olunub.

Məktəblilərarası fənn müsabiqələrində hər bir istiqamət üzrə 42 və 42-ci şagirdlə eyni nəticə göstərmiş şagirdlər, Lütfi Zadə adına riyaziyyat-məntiq olimpiadasında isə 60 və 60-cı şagirdlə eyni nəticə göstərmiş şagirdlər qalib hesab olunur.

Azərbaycan Respublikasının Təhsil İnstitutundan bildirilib ki, Lütfi Zadə adına riyaziyyat-məntiq olimpiadası üzrə nəticələr 5 iyun 2025-ci il tarixindən etibarən elan ediləcək.

Fənn müsabiqələrinin ilkin nəticələri isə yoxlama işi başa çatdıqdan sonra portal.edu.az üzərindən şəxsi kabinetlərə yüklənəcək.

Qeyd edək ki, Lütfi Zadə adına riyaziyyat-məntiq olimpiadası V, Fənn müsabiqələri isə VI və VII sinif şagirdləri arasında keçirilir. Müsabiqələrin keçirilməsinin əsas məqsədi istedadlı uşaqların aşkar olunması, şagirdlər arasında sağlam rəqabət mühitinin yaradılması, şagirdlərin məntiqi biliklərinin inkişafına təkan vermək, yaradıcı istedad və fərqli düşünmə qabiliyyəti ilə fərqlənən şagirdləri aşkara çıxarmaq, onlarla məqsədyönlü işlərin aparılmasından ibarətdir.