Sentyabrın 23-də Mərkəzi Aran Regional Təhsil İdarəsi (Mərkəzi Aran RTİ) ilə Mingəçevir Dövlət Universitetinin (MDU) əməkdaşlığı çərçivəsində “Nümunəvi məktəb” layihəsinin hazırlanması və tətbiqi ilə bağlı ilkin görüş keçirilib.

Bu barədə "tehsil.media"a universitetdən məlumat verilib.

Bildirilib ki, görüşdə Mərkəzi Aran RTİ və MDU-nun müvafiq bölmə və strukturlarından əməkdaşlar iştirak edib.

Mərkəzi Aran RTİ-nin müdir müavini Cavad Cavadov və MDU-nun Təhsil fakültəsinin dekanı Nizami Zeynalov son illər ölkədə təhsilin keyfiyyətinin artırılması istiqamətində görülən işlər, təhsilin inkişafı istiqamətində icra olunan layihələr haqqında məlumat veriblər, MDU ilə Mərkəzi Aran RTİ arasında olan əməkdaşlığın uğurlu model kimi fərqləndiyini və gələcəkdə birgə fəaliyyətlərin artacağına əminliklərini bildiriblər. Layihənin 1 şəhər və 6 rayonda icrasının nəzərdə tutulduğu, seçilmiş məktəblərin idarəetmə, sənədləşmə, infrasturktur, maddi-texniki baza və tədrisin təşkili vəziyyətinin öyrənilməsi və inkişaf etdirilməsi məqsədilə ilə bağlı meyarlar hazırlanacağı, həmçinin, Mərkəzi Aran RTİ ilə MDU-nun əməkdaşları tərəfindən sənədləşmə işinin aparılması, məktəb idarəetməsi, tədrisin təşkili istiqamətində nəzəri və praktiki dəstək və metodiki xidmətin götəriləcəyi bildirilib.

Layihə ilə bağlı ətraflı məlumat verildikdən sonra görüş iştirakçıları arasında fikir mübadiləsi aparılıb və təkliflər dinlənilib. Müzakirənin sonunda layihənin icrası ilə bağlı müvafiq işçi qrupu yaradılıb.

Qeyd edək ki, müasirləşməkdə olan MDU-nun regionda yerləşən təhsil müəssisələri ilə qarşılıqlı faydalı işbirliyinin gücləndirilməsi bu ali təhsil müəssisəsinin prioritet vəzifələri sırasındadır. 2023-cü ilin aprelin 20-də “Heydər Əliyev İli” çərçivəsində MDU və Mərkəzi Aran RTİ arasında imzalanmış Tədbirlər Planında da bu istiqamətdə birgə fəaliyyətlər əksini tapıb.