Bakı şəhərində 252 nömrəli məktəb-lisey var. Adı ilə nəticələri uyğun gəlməyən bu məktəbin direktoru Eldəniz Əkbərov bura təyin ediləndən bəri sözün əsil mənasında biznes mühiti yaradıb. Adamın tamah dişi o qədər uzundur ki, müəllimdən valideynə, bufetçidən xadiməyə qədər uzanır.

tehsil.media xəbər verir ki, məktəbin nəticələri, təhsilin keyfiyyəti Eldəniz müəllimi maraqlandırmır. Onun maraq dairəsində ən əsas yeri pul tutur. Nədən ki, Eldəniz müəllimin arxasında BŞTİ-nin müdir müavini Xəyalə Əhmədzadə dayanır. Ona görə də bu məktəbdə pulyığma kampaniyası böyük sürətlə davam edir. Hər ayın əvvəlində hər müəllimin müəyyən edilmiş norması var. Bundan başqa ibtidai sinif müəllimləri 100-150 manat, yuxarı sinif müəllimləri də bir o qədər ödəməli olurlar. Təbiidir ki, bu ödəmələr müəllimin əmək haqqına qalsa mümkün deyildir. Sadəcə Eldəniz müəllim elə şərait yaradıb ki, kim harada, necə bacarırsa qazanır və ödəyir. Beləliklə, nə şiş yanır, nə də kabab.
Vaxtilə BŞTİ-nin müdiri, sonra ETN-də şöbə müdiri olan, indi isə Şəmkir rayon İH başçısı vəzifəsində işləyən Rəşad Tağıyevin təsiri də özünü göstərir. Bir yandan Rəşad Tağıyevə, digər yandan BŞTİ-nin müdir müavini Xəyalə Əhmədzadəyə arxayın olmaq Eldəniz müəllimin işinə yarayır. Özünün dediyinə görə bu iş elə-belə başa gəlmir. Deyir ki, əcəb edirəm, alıram, lazım olan yerə də verirəm. Ona görə də mənə kimsə bir söz deyə bilməz.
Eldəniz Əkbərov beləliklə bütün pedaqoji işçilərlə alış-veriş prosesində olduğundan kifayət qədər gözükölgəli durumdadır. Ona görə də heç bir müəllimə söz deyə bilmədiyindən var gücü ilə 345 manata işləyən, bütün günü toz udmaqdan savayı bir gəliri olmayan xadimələrə sözün əsil mənasında divan eləyir. Xadimə demişkən, Sevda adlı xadiməni elə günə qoyub ki, ürəyi gedib. Nədir, nədir, Sevda Eldəniz müəllimin kriteriyalarına uyğun gəlmir.
Burda deyiblər ki, “eşşəyə gücü çatmır, palanı tapdalayır”. Hər halda, onun bu qədər qəddarlıqla və insafsızca davarnışları həm məktəbdə işgüzar mühitə, həm də tədrisin keyfiyyətinə ciddi ziyan vurur. Özündən müştəbeh olan bu əlahəzrət məktəbi öz bostanı kimi idarə edir. İş o yerə çatıb ki, Eldəniz müəllim ona heç bir tsabeçiliyi olmayn, tenderdə qalib gələrək məktəb bufetini işlədən şirkətin işçisindən- bufetçidən belə, ayda 250 manat pul alır. Hansı əsasla, necə, bax bu sual hələ ki cavabsızdır.
Araşdırmalarımız davam edir və bu barədə növbəti yazılarımızda ətraflı məlumat verəcəyik.
Aydın olacaq ki, Eldəniz Əkbərovun biznesinin sərhədi nə qədər uzanır və bu biznesin şərikləri kimdir? Son olaraq qeyd edək ki, bu yaxınlarda bu biznesin əsas fiqurlarından biri olan Fuad Babayevin BŞTi-də tutduğu vəzifədən məhz belə səbəblərdən qovulması bir qədər də Eldənizin kürkünə birə salıb. Lakin Mehriban Vəliyeva kimi dişsiz müdiri olan, Xəyalə Əhmədzadə kimi təcrübəli biznesmeni olan idarənin tabeliyində eldənizlərin at oynatması, təhsilə və işçilərə yağı kəsilməsi təəccüblü deyildir.