Avropa İttifaqının maliyyə dəstəyi ilə Təhsil İnstitutunun benefisiar olduğu “Azərbaycanda təhsil sisteminin dayanıqlılığının gücləndirilməsi və AzMKÇ 5-ci səviyyə kvalifikasiyalarının təkmilləşdirilməsi üçün Elm və Təhsil Nazirliyinə dəstək” adlı texniki yardım layihəsi çərçivəsində yaradılmış “Şagirdlərin qiymətləndirilməsi” işçi qrupunun 20-21 noyabr və 4-5 dekabr tarixlərində dördüncü və beşinci təlim görüşləri baş tutub.

tehsil.media xəbər verir ki, bu barədə Təhsil İnstitundan məlumat verilib.

Təlimin keçirilməsində əsas məqsəd diaqnostik qiymətləndirmə, özünüqiymətləndirmə və yoldaş qiymətləndirməsini araşdırmaq, sözügedən qiymətləndirmə üzrə “Milli Çərçivə Sənədi”ni nəzərdən keçirmək, yekunlaşdırmaq və təsdiq etmək olub. Bununla yanaşı, müəllimlər, valideynlər və şagirdlər üçün məktəbdaxili qiymətləndirmə (MDQ) üzrə təlimatları, o cümlədən lüğəti nəzərdən keçirtmək, yekunlaşdırmaq və təsdiq etmək də təlimin əsas istiqamətlərindən biri olub.

Təlimdə spiker qismində Maya Yukiç çıxış edib. 20-21 noyabr tarixlərində keçirilən təlim zamanı iştirakçılar şagirdlərin qiymətləndirilməsi üzrə Milli Çərçivə layihəsinin müzakirəsi, müəllimlər üçün MDQ üzrə təlimat layihəsinin müzakirəsi, valideynlər və şagirdlər üçün MDQ üzrə təlimat sənədinin müzakirəsini aparıb və təkliflər irəli sürüblər.

Təlimin sonunda iştirakçılar imtahan texnologiyasının müxtəlif aspektləri haqqında beynəlxalq təcrübənin öyrənilməsi, eyni zamanda yeni siyasət sənədlərinin hazırlanmasında iştirak edərək müasir yanaşmanın tətbiq edilməsi ilə bağlı ətraflı məlumat əldə ediblər.

4-5 dekabr tarixlərində keçirilən təlim görüşlərinin əsas məqsədi isə imtahan texnologiyası ilə daha yaxından tanış olmaq (imtahan növləri, imtahan qaydaları, müxtəlif imtahan texnologiyalarının üstünlükləri və çatışmazlıqları, müxtəlif qiymətləndirmə alətləri və texnologiyaları, qiymətləndirmə prosesini təkmilləşdirmək və vaxtında rəy vermək üçün texnologiyadan necə istifadə etmək və s.), imtahanın hazırlanması mərhələlərini (struktur və layihənin hazırlanması) və digər imtahan materiallarının hazırlanması qaydalarını təhlil etmək, 2024-2025-ci il “Milli qiymətləndirmə”nin imtahan strukturunu və imtahan layihəsinin bir hissəsinin layihələndirilməsindən ibarət olub.

Təlimdə spiker qismində Maya Yukiç və Srdcan Verbiç çıxış ediblər. Sözügedən tarixlərdə keçirilən təlimlər zamanı iştirakçılar imtahan texnologiyaları, imtahan strukturu, imtahan layihəsinin hazırlanması üzrə qrup işləri görmüşlər. O cümlədən təlimlər zamanı iştirakçılar imtahan texnologiyasının müxtəlif aspektləri haqqında beynəlxalq təcrübənin öyrənilməsi, eyni zamanda yeni siyasət sənədlərinin hazırlanmasında iştirak edərək müasir yanaşma ilə daha yaxından tanış olublar.

Qeyd edək ki, sözügedən işçi qrupunda 35 nəfər iştirak edir.