Elm və Təhsil Nazirliyinin Nəsirəddin Tusi adına Şamaxı Astrofizika Rəsədxanasında (ŞAR) Gənc Alim və Mütəxəssislər Şurasının (GAMŞ) növbəti genişləndirilmiş astroseminarı keçirilib.

Rəsədxanadan "tehsil.media" a bildirilib ki, seminara rəhbərlik edən astronomiya üzrə fəlsəfə doktoru Ülkər Rüstəm seminarı giriş sözü ilə açaraq, tədbir iştirakçılarını salamlayıb və onlara məruzənin mövzusu haqqında məlumat verib.

Sonra Şamaxı Astrofizika Rəsədxanasının Qoşa ulduzlar və eruptiv proseslər şöbəsinin elmi işçisi Aysel Rüstəmova “AG Peg simbiotik ulduzunun fotometrik və spektral tədqiqi” mövzusunda məruzə ilə çıxış edib.

Təqdim olunan işdə AAVSO dəyişən ulduzların fotometrik məlumatlar bazasından istifadə etməklə AG Peg simbiotik ulduzunun 68 illik (1954-2022-ci il) dövr üçün parlaqlıq əyrisi qurulmuşdur. Ulduzun parlaqlıq əyrisində 2 periodik dəyişmə (Uzun period P=17857.148 gün; Qısa period P=814.99 gün) aşkar edilmişdir. Hesab olunur ki, qısa period qoşa sistemdəki qırmızı nəhəng və ağ cırtdanın ümumi kütlə mərkəzi ətrafında orbital hərəkəti ilə bağlıdır.

2016-2019-cu illərdə N.Tusi adına ŞAR-ın 2-m teleskopunda optik lifli Şamaxı eşele spektroqrafında (ShAFES) alınmış yüksək ayırdetməli spektrlər əsasında AG Peg ulduzunun spektral tədqiqi aparılmışdır. Ulduzun fotometrik tədqiqatından tapdığımız təqribən 815 sutkalıq period üçün spektrlərin alınma tarixinə uyğun AG Peg qoşa sisteminin orbitinin fazaları hesablanmışdır. Seçilmiş emissiya xətləri: Hα, Hβ, HeI λ 5876 Å və HeII λ 4686 Å və spektrin 5000-8000 Ǻ oblastında seçilmiş 30-a yaxın udulma xəttinin əsas parametrlərinin sistemin orbital fazasından asılı olaraq mümkün dəyişmələri təhlil olunub.

Məruzə seminar iştirakçıları tərəfindən maraqla qarşılanıb. Çıxışın yekununda mövzu ətrafında geniş müzakirə aparılıb, suallar cavablandırılıb.