Qanunla Azərbaycanda 18 yaşına çatmış hər bir vətəndaş həqiqi hərbi xidmətə yollanır. Ali təhsil alan oğlanlara isə məzun olana qədər möhlət verilir. Tələbə adını qazana bilməyənlər yaşları tamam olduqdan sonra əsgərliyə gedirlər.



Maraqlıdır, əsgərlik oğlanların ali təhsil almasında nə dərəcədə rol oynayır?



Mövzu ilə bağlı Təhsil Nazirliyi yanında İctimai Şuranın məsul katibi İlqar Orucov Təhsilmedia.az-a danışıb.



“İki dəfə imtahan verib, ali təhsil müəssisəsinə qəbul ola bilməyən məzunun kifayət qədər biliyi yoxdur”,-deyə İ.Orucov vurğulayıb: “Oğlanlara ali təhsil almaları üçün 1 il əlavə möhlət verilməsinin tərəfdarı deyiləm. Kifayət qədər biliyi olan məzunlar orta məktəbi bitirdikdən dərhal sonra ali təhsil müəssisələrinə qəbul ola bilirlər. Nəzərə almalıyıq ki, son illər qəbul imtahanları ildə 2 dəfə keçirilir. İki şansdan yararlana bilməyən məzunun ali təhsil almaq üçün kifayət qədər biliyi yoxdur. Bütövlükdə ümumi mənzərəni təhlil etsək görərik ki, xeyli sayda oğlan var ki, hərbi xidmətdən gələndən sonra təhsillərinə davam edirlər. Oxumaq istəyən, üzərində çalışan hər bir gənc üçün ali təhsil almaq problem deyil. Hətta bəzən oğlanlar hərbi xidmətə gedəndən sonra həyatın bərkinə, boşuna, acısına və hərbi xidmətin onlara verdiyi həyat tərzindən sonra onlar hazırlaşaraq ali təhsil müəssisələrinə qəbul olunmaq şansını dəyərləndirirlər. Bu baxımdan da əlavə möhlətin verilməsi fikrimcə, düzgün olmaz”.



İctimai Şuranın katibi qeyd edib ki, əvvəllər magistraturaya qəbul zamanı bakalavr məzunlarına möhlət verilmirdi: “Biz İctimai Şurada bu məsələni dəfələrlə qaldırıb, müvafiq dövlət qurumlarına müraciət etdik və nəticədə bu problem həll edildi. Artıq magistraturaya qəbul imtahanında iştirak edən və magistraturada təhsil alan oğlanlara da hərbi xidmətdən möhlət verilir. Qeyd edim ki, bu proses doktorantura pilləsi üçün də keçərlidir.

Təhsilin qarşısında duran birinci vəzifə cəmiyyət üçün sağlam vətəndaş yetişdirməkdir. Orta məktəbi bitirən oğlanların hər biri ali təhsil ala bilməz. Bu başa düşüləndir, çünki onların arasında peşə sahibi olanlar, öz işini quranlar, peşəkarlar və s. olacaq. Mən düşünürəm ki, ən böyük vəzifələrdən biri vətəni qorumaqdır. Hərbi xidmətə yollanmaq şərəf işidir, kişilik məktəbidir. Düşünürəm ki, oğlan hərbi xidmətə getdi, təhsildən kənarda qaldı fikri düzgün deyil.Təhlillər göstərir ki, xeyli oğlan hərbi xidmətdən sonra təhsillərinə davam edir”.