Vaterlu Universitetinin riyaziyyat fakültəsinin riyaziyyat və biznes üzrə proqramlar direktoru, professor İlham Axundova
AÇIQ MƏKTUB
Hörmətli İlham müəllim!
Yazırsınız ki, Milli Məclisin hazırda STEM üzrə elmlər namizədi olan üzvlərinin sayını barmaqla saymaq olar: “Müqayisə üçün bu, hüquq və tarix dərəcələri olan üzvlərin sayına görə çox aşağıdır.” Düşündürücü fikirdir. Niyə məhz Milli Məclisdə? Milli Məclis qanunverici orqandır, təhsil və elm sahələlərində mütərəqqi qanunların qəbul olunmasında bu qurumun bütün üzvləri aktiv iştirak edirlər. Azərbaycan təhsilindəki problemlər təkcə qanunvericiklə bağlı deyil. Elmə və təhsilə dərindən bağlı şəxs olduğunuz üçün Azərbaycan təhsilindən kifayət qədər məlumatlısınız. Və sosial şəbəkədə yazdığınız yazılar əsl dərsdir.
Hörmətli İlham müəllim!
Hər bir ölkənin böyük alimləri, intellektualları həmin ölkələr üçün dəyərdir. Onlara nəzakətlə və hörmətlə yanaşırlar. Onları barmaqla göstərirlər. Azərbaycanda tarixən böyük alimlər və intellektuallar yetişib. Əlbəttə ki, bir nəsil ondan sonra gələn nəsli yetişdirməlidir. Hər bir nəslin obrazı var və hər zaman müzakirə olunur. Azərbaycanımızın hər bölgəsindən istedadlar çıxır. Bizim ölkəmiz istedadlar ölkəsidir və Siz də Azərbaycan məktəbinin yetirməsisiniz...Anadangəlmə istedadlılarla yanaşı məktəbin və müəllimlərin də yeteşdirdiyi şəxslər az deyil. Məktəb və müəllimlər istedadlı uşaqları göz bəbəyi kimi qorumalı və onlara ən lazımlı və dərin bilikləri verməlidirlər. SSonrakı məsuliyyət Universitetlərin, kolleclərin, peşə məktəblərinin üzərinə düşür. Əsl alimlər və intellektuallar Vətəni sevməlidirlər. Bu yol mütəxəssis hazırlamaq yoludur. 2019-cu ildə Bakıda keçirilən Beynəlxalq İnformatika Olimpiadasında Ukraynanın kiçik bir əyalətindən Melnik soyadlı “İnformatika” müəlliminin hazırladığı 4 məktəblinin 1 nəfəri qızıl, 1 nəfəri isə bürünc medal qazandı. Melnik ölkəsini tərk etmir, yeni nəsil Olimpiada qaliblərini yetişdirməkdə davam edir.
Azərbaycanın ən yaxşı alimləri Xarici ölkələrdə çalışırlar. Zəngin insan kapitalına əlavələr edirlər. Böyük zəfərdən sonra ölkəmizin qarşısında insan kapitalını inkişaf etdirmək kimi çətin vəzifə durur. Zəif kadr potensialı, zəif orta və Ali məktəblə bu işin öhdəsindən gəlmək çox çətindir. Sizin kimi alimlərin bu vacib problemin həllinə dəstəyi çox vacibdir. Məncə xaricdə yaşayan böyük alimlərimizin Klubu yaradılmalıdır. Bu klubun üzvləri ölkə təhsilini və elmini mütəmadi olaraq müzakirə etməlidirlər. İstedadlı şagird və tələbələrə mühazirələr oxumalıdırlar. Yaşadığımız əsrin çağrışlarına cavab olaraq bir istedadlı uşağın belə kənarda qalmasına imkan verməməliyik. Və istedadların sönməməsi üçün əlimizdən gələni əsirgəməməliyik.
Aziz Sancar nümunəsi çox önəmlidir. Böyük alim Amerikada “Türk evi” açıb və sahəsi üzrə türkləri tədqiqatlara cəlb edir. Məlumdur ki, kənarda yaşayırsansa, yaşlaşdıqca insanda vətən nisgili daha da çoxalır.
Təhsilimiz, elmimiz və dəyərli şəxsiyyətlərimiz zaman itirməməlidir!
Gələcək işlərinizdə Sizə uğurlar arzulayıram...

Etibar Əliyev