"Dünyəvi icbari ümumi orta təhsil üzrə dərs gününün şagird tərəfindən 1 ay ərzində 7 gündən çox buraxılmasına görə 100 manat miqdarında cərimə tətbiq edilir. Bununla bağlı qanuna müvafiq dəyişikliklər edilib. Qaldırılan məsələ təhsil cəmiyyətində birmənalı qarşılanmır".
Bu fikirləri
TehsilMedia.az-a açıqlamasında təhsil eksperti Nadir İsrafilov deyib. O bildirib ki, məsələnin həlli düşündüyümüz qədər də sadə və asan deyil: "Hər şeydən əvvəl dərsdən yayınmanın səbəbləri hərtərəfli araşdırılmalı, geniş müzakirə olunmalı, yaranan vəziyyətdən çıxış yolu kimi ilk növbədə daxili nizam-intizam qaydalarının gücləndirilməsi üzrə məktəblə yanaşı valideynlərin və şagirdlərin məsuliyyətinin artırılması istiqamətində ciddi addımlar atılmalıdır. Əks təqdirdə, dərsdən yayınma təhsildən yayınmanı, təhsildən yayınma isə küçə uşaqlarının və erkən nikahların sayının artımını qaçılmaz edəcək”.
Nadir İsrafilov sözlərinə görə, müəllim məktəbdən, şagird müəllimdən uzaq düşüb: "Korporativ maraqların əksinə olaraq məktəb mühitinin deformasiyaya uğramasının qarşısı alınmalı, müəllim və şagird məktəbə qaytarılmalıdır. Məktəb kollektivi və valideyn icmaları arasında qarşılıqlı münasibətləri tənzimləyən əməkdaşlıq konsepsiyası hazırlanmalıdır. Şagirdlərin internetdən asılılığını məhdudlaşdırmaq istiqamətində iş aparılmalıdır. Məktəblərimizin repetitor və hazırlıq kurslarının əlavəsinə çevrilməsinə, qeyri-rəsmi fəaliyyət növünün rəsmi fəaliyyət növünü üstələməsinə yol verilməməsi üçün müvafiq addımlar atılmalıdır. Nə qədər ki, dərs deməyə müəllimin, dərs dinləməyə şagirdin həvəsi olmayacaq, dərsdən yayınmalar da bir o qədər qaçılmaz olacaq.”
TƏHSİL MEDİA