Evlənmək mentalitetimizdə o qədər önəmli yer tutur ki, sanki evlənməsən, bütün cəmiyyət səni qınayacaq. Evlənməyən qızlara “evdə qalıb”, “alan yoxdur” deyimləri ilə psixoloji təsir edənlərin də sayı az deyil. Burada valideynlərin də rolu böyükdür. Bir sıra valideynlər övladlarının karyerası barəsində düşünərkən, digərləri isə istəyən olsa idi, ərə verərdim düşüncəsindədir. Heyif ki, bu düşüncələr gənc qızlarımızın fəlakəti olur.
Bu fəlakətlərdən biri də 20 yaşında ailəli və övladı olan Bakı Dövlət Universitetinin tələbəsinin başına gəlib. Belə ki, o, əri tərəfindən amansızlıqla qətlə yetirilib. Halbuki, onun hələ reallaşdırmaq istədiyi xəyalları, geyinəcəyi məzun xalatı var idi...
Bəzən də belə fikirlər formalaşır ki, ali təhsil almayan qızların tez evlənməyi normaldır. Axı edəcəkləri bir iş yoxdur. Və onların ailə qurduqdan sonra şiddət və yaxud təzyiqə məruz qalmalarına rəğmən susmaqları və dözməkləri normal qarşılanır. Lakin ali təhsilli qızların tez evlənməyi və şiddətə məruz qalmaları birmənalı qarşılanmır.
Bu mövzuda
Fərqanə Mehmanqızı TehsilMedia.az-a açıqlama verib.
Hər təhsil alan qız təhsil almayan qızdan üstün deyil. Və bu o mənaya gəlmir ki, ali təhsil alan qızlar dünyagörüşlü və savadlıdır.
Bundan əlavə cəmiyyətimizdə “ərə getmək” elə yüksək missiya kimi aşılanıb ki, ali təhsilli qızlarımız da evdə qalmaq qorxusundan istəməsələr belə, məcburən evlənirlər.
Ailədə valideynlər övladlarına o qədər təzyiq göstərirlər ki, sən ərə getməlisən, övlad dünyaya gətirməlisən. Hətta çox vaxt bu təzyiqlərə dözə bilməyən gənclər intihar etməyə belə cəhd göstərirlər.
Hər təhsil alan qadın sərbəst düşüncə ilə, sərbəst şəkildə öz həyatını idarə edə bilmir. Və bir yalnış fikir də formalaşıb ki, ali təhsil alanlar ağıllı olur.
Azad düşüncəli qadınların formalaşmasında valideynlərin təsiri çox böyükdür. Əlbəttə, burada təhsilin də rolu böyükdür.
Şəxsiyyət baxımından formalaşan gənclər ailə qurmaq üçün sağlam düşüncəli insanlar seçməyə daha çox qadirdirlər.
Ərləri tərəfindən öldürülən xanımların sayı statistikaya əsasən günü-gündən artır. Yoldaşından əl çəkməyən, olduqca qısqanc ərlər gənc xanımların həyatını məhvə sürükləyirlər.
Buna görə övladlarını evliliyə məcbur edən valideynlər arasında maarifləndirmə işləri aparılmalıdır.
Ülkər Abdurahmanlı