Təhsil eksperti, Təhsil İşçilərinin Həmrəyliyi Alyansının sədri Əmrah Həsənli Mingəçevir şəhəri 14 nömrəli məktəbdə çalışan müəllim Zəminə Qarayevaya qarşı aparılan kampaniyaya münasibət bildirib. Ekspert sosial media hesabında paylaşdığı açıqlamada məsələnin təkcə bir müəllimə qarşı deyil, ümumilikdə müəllim nüfuzuna qarşı yönəldiyini vurğulayıb.

Əmrah Həsənli qeyd edib ki, Zəminə Qarayeva uzun illərdir pedaqoji fəaliyyətlə məşğuldur və bu müddət ərzində öz peşəsinə məsuliyyətlə yanaşan, şagird və valideynlər tərəfindən hörmətlə qarşılanan bir mütəxəssis kimi tanınıb. Buna baxmayaraq, son günlərdə onun diplomunun saxta olması ilə bağlı sosial şəbəkələrdə sübutsuz məlumatlar paylaşılır və məktəbdə onun işdən uzaqlaşdırılması məqsədilə imza toplandığı bildirilir.

Xüsusilə narahatedici məqam isə məktəbdə fəaliyyət göstərən Azad Həmkarlar İttifaqı nümayəndəsinin də bu imza kampaniyasına qatılmasıdır. Əmrah Həsənli bunu həmkarlar həmrəyliyinə zidd hal kimi qiymətləndirib və Azərbaycan Həmkarlar İttifaqları Konfederasiyasını (AHİK) məsələyə müdaxilə etməyə çağırıb.

Ekspert məsələ ilə bağlı araşdırmanın yalnız Mərkəzi-Aran Regional Təhsil İdarəsi səviyyəsində deyil, eyni zamanda Məktəbəqədər və Ümumtəhsil üzrə Dövlət Agentliyi tərəfindən də aparılmasının vacibliyini vurğulayıb. O bildirib ki, belə halların obyektiv və şəffaf şəkildə araşdırılması təhsildə ədalət və güvən prinsiplərinin qorunması baxımından xüsusi əhəmiyyət daşıyır.

Əmrah Həsənli sonda bütün təhsil ictimaiyyətini bu məsələdə susmamağa, müəllim nüfuzunu birgə qorumağa çağırıb:
“Müəllim nüfuzunu qorumaq – sadəcə peşə borcu deyil, insanlıq və vicdan məsuliyyətidir. Biz birlikdə dayanmalı, haqsızlığa qarşı susmamalıyıq. Müəllim tək qalmamalıdır.”