Qoluna avtomat silahını döymə etdirən kim, qarın nahiyəsinə xəncər vurduran kim. Bu tip döymələri etdirib sosial şəbəkə hesablarında paylaşan yeniyetmələrə son illərdə tez-tez rast gəlmək mümükündür. Hətta kriminal aləmə yaxın jarqon ifadələri işlədən yeniyetmələr də var.
TehsilMedia.az-ın məlumatına görə. psixoloq
Esmira Qafarova deyir ki, uşaqların kriminal aləmə maraq göstərməsinin əsas səbəbi valideyn diqqətsizliyidir. Psixoloqun sözlərinə görə, valideynlər uşaqlarının azyaşlı vaxtlarında izlədiyi videolara nəzarət etməlidir. Sosial şəbəkələrdə kriminal aləmi əks etdirən videosüjetlər yeniyetmələrə mənfi təsir göstərir. Ekspert deyir ki, bəzən belə kriminal videolar paylaşan uşaqlarda uşaqlıq travmaları mövcud olur. Belə faktları aşkar edən valideynlər və yaxud yaxınları uşaqları nəzarətə götürməli və onları ətrafındakı yeniyetmələrdən təcrid etməlidir.
Yetkinlik yaşına çatmayanların internet informasiya resurslarında belə video və fotolar paylaşması Ailə, Qadın və Uşaq Problemləri üzrə Dövlət Komitəsinin nəzarətinə götürülüb. Komitənin əməkdaşı
Seymur Məmmədov bildirir ki, bu onları narahat etdiyi üçün ictimailəşdirilir və aidiyyatı qurumlar bu məsələ ilə bağlı tədbirlər görürlər. O bildirir ki, bu kateqoriyadan olan uşaqlarla ciddi iş aparılmalıdır ki, onlarda xuliqanlığa və cinayətkarlığa olan maraq azalsın. Onun sözlərinə görə, nəzarətsiz qalan uşaqlar hər hansısa bir cinayət əməli törədərsə, onların valideynləri də inzibati qaydada məsuliyyətə cəlb olunur.