Bir müddət öncə Goranboy rayonu Rus Borisi kənd tam orta məktəbinin direktoru vəzifəsində çalışan Roman Səfərəliyevin təhsil müəssisəsini əsl bazar qanunları ilə idarə etdiyi haqda xəbər vermişdik. Belə ki, təhsil işçisi Neman Eminov direktorun məktəbə gəlməyən və dərslərə girməyən şagirdlərə qiymət yazılması haqda tapşırıq verdiyini iddia edirdi. Üstəlik, Roman Səfərəliyevin kitabxanaçını ali təhsilli kimi qeydiyyata saldığını, onun əlavə maaş almasını təmin etdiyini, eləcə də özünə artıq dərs saatları yazaraq pul qazandığını bildirirdi.
TehsilMedia.az-ın redaksiyasına bu dəfə Goranboyun Rus Borisi kənd orta məktəbinin direktoru haqda yeni ilginc faktlar daxil olub. Adının açıqlanmasını istəməyən mənbənin iddiasına görə, Goranboy rayonu Rus Borisi kənd tam orta məktəbinin ibtidai sinif müəllimi vəzifəsində çalışan, eyni zamanda təhsil müəssisəsinin direktoru Roman Səfərəliyevin həyat yoldaşı olan Veronika Səfərəliyeva həm də kəndin bələdiyyə sədridir.
Həyat yoldaşı məktəb direktoru, özü isə ibtidai sinif müəlliməsi olan Veronika Səfərəliyeva eyni anda iki vəzifə daşıyır ki, bu da ölkə qanunlarına zidd sayılmalıdır. Üstəlik, onun bu vəzifələri necə rəsmiləşdirdiyi haqda da heç bir məlumat yoxdur. Görünən odur ki, Roman və Veronika Səfərəliyevlər Rus Borisi kəndini öz mülkləri kimi özəlləşdirərək kənddəki bütün vəzifələri mənimsəyiblər. Aidiyyatı qurumların bu məsələlərə göz yumması isə digər qaranlıq məqamlardan xəbər verir. Maraqlıdır, görəsən ibtidai sini müəllimi eyni zamanda kənd bələdiyyəsinin sədri vəzifəsində necə işləyir? Buna qanun icazə verirmi? Ümid edirik ki, bütün bu açıq qalan sualların cavabını aidiyyatı qurumlar verəcəklər.
P.S. Yazıda adı çəkilən şəxslərin mövqeyini dərc etməyə hazırıq!