Türkiyənin Bilecik şəhərində azərbaycanlı rəssam Elçin Mustafayevin “Rənglərin səsi” adlı fərdi rəsm sərgisinin açılış mərasimi keçirilib.

Bu barədə "tehsil.media"a Azərbaycan Respublikasının Diasporla İş üzrə Dövlət Komitəsindən bildirilib.

Atatürk Parkı İncəsənət Qalereyasında baş tutan tədbirdə Bilecik Şeyx Edebali Universitetinin rektorunun müavini, Prof. Dr. Cenk Karakurt, prorektor Prof. Dr. Sıddıka Özkaldı Karakuş, müəllim-tələbə heyəti və şəhər ictimaiyyətinin nümayəndələri iştirak ediblər.

Mərasimdə çıxış edənlər sərgi münasibətilə Bilecik Şeyx Edebali Universitetinin Təsviri sənət və dizayn fakültəsinin müəllimi Elçin Mustafayevi təbrik ediblər. Bildirilib ki, rəssamın kətan üzərində akril boyalarla yaratdığı əsərlər, o cümlədən 130 x 130 sm ölçüsündə olan “Topkapı Sarayı” tablosu sənətsevərlərdə böyük maraq doğurur. Bu əsərin İstanbul Fatih Bələdiyyəsi tərəfindən təşkil edilən “Məkanda və divarda yaddaş” rəsm müsabiqəsində fəxri fərmanla mükafatlandırıldığı vurğulanıb.

Qeyd edək ki, 6 dekabr 1988-ci il tarixdə Azərbaycanın Şəki rayonunda anadan olan rəssam Azərbaycan Dövlət Rəssamlıq Akademiyasının qrafika fakültəsində bakalavr, Türkiyənin Səlcuq Universitetində magistr pilləsi üzrə təhsil alıb.   Azərbaycan Rəssamlar İttifaqının üzvüdür. 2013-cü ildən İstanbuldakı özəl “Miniatür Art” şirkətində işləyir, 2016-cı ildən bu şirkətdə tarixi əsərlərin miniatür olaraq hazırlanması və boyanılması emalatxanasının baş rəssamıdır. 2019-cu ilin sentyabrından Bilecik Şeyx Edebali Universitetinin Təsviri sənət və dizayn kafedrasında müəllim işləyir. “Türkiyədə Yaşayan Azərbaycanlı Rəssamların III Rəsm Sərgisi”ndə, İstanbul Universitetində “Bir kərə yüksələn bayraq bir daha enməz” adlı tədbir çərçivəsində təşkil olunmuş Türkiyədə yaşayan və fəaliyyət göstərən gənc rəssamların işlərindən ibarət rəsm sərgisində iştirak edib. 2019-cu ildə İstanbulun Ümraniyə Bələdiyyəsi tərəfindən təşkil olunmuş XV rəsm müsabiqəsində onun “Metroda ayaq üstündə dayanan qoca” tablosu I yerə layiq görülüb.