Azərbaycan Tibb Universitetinin (ATU) müalicə və profilaktika fakültəsinin IV, V və VI kurs tələbələrinin TƏBİB-in tabeliyində olan tibb müəssisələrində orta tibb heyəti üzrə işə qəbulu” Proqramı üzrə görülən işlərə həsr olunan hesabat tədbiri keçirilib.

tehsil.media xəbər verir ki, Yeni Klinikada baş tutan tədbirdə açılış nitqi ilə çıxış edən TƏBİB-in İnsan resursları departamentinin rəhbəri Günəş Qədimova layihə haqqında ətraflı məlumat verib:

“Layihə başlandığı gündən etibarən böyük maraqla qarşılanıb. Belə ki, 435 tələbə bununla bağlı TƏBİB-ə müraciət edib. TƏBİB komandası tərəfindən namizədlərin uyğunluğu dəyərləndirilib və müsahibədən uğurla keçən 132 namizəd iş mühitinə daha tez adaptasiya olmaq, bilik-bacarıqlarında səriştəliliyi artırmaq məqsədilə peşəkar mütəxəssislərimiz tərəfindən keçilən təlimlərə cəlb olunub.

Təlimlərdə müvəffəqiyyət qazanan 132 gəncin hər biri TƏBİB-in 13 tabeli tibb müəssisəsində işlə təmin olunub. 65 nəfər Akademik M.Ə.Mirqasımov adına Respublika Klinik Xəstəxanasında, 16 nəfər Nərimanov Tibb Mərkəzində, 13 nəfər Mərkəzi Neftçilər Xəstəxanasında, 9 nəfər Yeni Klinikada və 29 nəfər digər tibb müəssisələrimizdə işə qəbul olunub”.

G.Qədimova karyeralarının başlanğıcında olan bu gənclərin hər birinin öz sahələri üzrə peşəkar kadr kimi yetişəcəklərinə, səhiyyənin inkişafı naminə səfərbər olacaqlarına inandığını söyləyib.

TƏBİB-in icraçı direktoru Vüqar Qurbanov isə keyfiyyətli tibbi xidmətin səhiyyə infrastrukturu ilə yanaşı, kadr təminatı ilə bağlı olduğunu bildirib:

“Biz bu gün xəstəxanalarımızı nə qədər müasir standartlara uyğun təchiz etsək, ən son müasir tibbi avadanlıqlarla təmin etsək də, əgər peşəkar həkim-mütəxəssislərimiz olmasa, uğurlu nəticə almaq mümkün deyil. Bu baxımdan bütün dövrlərdə yüksək ixtisaslı tibb işçilərinin yetişdirilməsi Azərbaycan səhiyyəsi üçün prioritet istiqamətlərdəndir”.

V.Qurbanov TƏBİB-in tabeliyindəki tibb müəssisələrinə orta tibb işçisi kimi fəaliyyətə cəlb olunmaqla səhiyyə sahəsində ilk addımlarını atmaqları, özlərini inkişaf etdirmələri, bilik və bacarıqlarını təkmilləşdirmələri istiqamətində hər zaman gənclərə yardımçı olacaqlarını vurğulayıb.

Daha sonra çıxış edən səhiyyə nazirinin müavini Nadir Zeynalov istənilən sahədə nəzəri bilikləri dərinləşdirmək, öz işinin peşəkarı olmaq üçün praktik vərdişlərin əhəmiyyətinin çox böyük olduğunu qeyd edərək tələbələrin işlə təminatını yüksək qiymətləndirib.

Kliniki Tibbi Mərkəzin direktoru Könül Ələkbərov, Yeni Klinikanın direktoru vəzifəsini icra edən baş həkim Cavid Paşayev, Akademik M.Ə.Mirqasımov adına Respublika Klinik Xəstəxanasının direktoru Elviz Qasımov gənclərin təhsillərini davam etdirdikləri bir dövrdə işlə təminatları və əmək mühiti ilə tanış olmalarının bu tələbələrin gələcək karyerasında mühüm rol oynayacağını bildiriblər.

ATU-nun tələbələri Yusuf Xəlil, Nigar Quliyeva çıxış edərək onlara bu şəraiti yaratdıqlarına görə TƏBİB-ə, universitetə, həmçinin layihənin ərsəyə gəlməsində iştirak edən hər kəsə dərin minnətdarlıqlarını bildirərək, Azərbaycan səhiyyəsinin inkişafına öz töhfələrini verməyə çalışacaqlarını vurğulayıblar.

Tədbirin sonunda təlimlərdə uğur qazanan tələbələr təltif olunublar.

TƏHSİL MEDİA