Elm və Təhsil Nazirliyi Dendrologiya İnstitutunun elmi şurasının növbəti iclası keçirilib.

Bu barədə "tehsil.media"a institutdan məlumat verilib.

Bildirilib ki, iclasda institutun əməkdaşı Vüsalə Bədəlovanın biologiya üzrə fəlsəfə doktoru elmi adı almaq üçün təqdim etdiyi “Passiflora cinsinə aid bəzi növlərin Abşeronda introduksiyası, bioekoloji xüsusiyyətləri və fitokimyəvi tədqiqi” mövzusunda dissertasiya işi müzakirə edilib və növbəti mərhələdə müdafiəyə təqdim edilməsi qərara alınıb.

Tədqiqat işinin əsas məqsədi Abşeronun quru subtropik iqlim şəraitində Passiflora L. cinsinə aid bəzi perspektivli növlərin introduksiyasının, iqlimləşdirilməsinin və bioekoloji xüsusiyyətlərinin öyrənilməsi, farmakoqnostik tədqiqi, tərkibindəki bioloji aktiv maddələrin təyini, komponent tərkibi, qida sənayesində, tibdə və yaşıllaşdırmada tətbiqidir. Tədqiq olunan növlərin tərkibindəki bioloji aktiv maddələr müasir üsullarla bitkidən ayrılaraq komponent tərkibinin kəmiyyət və keyfiyyət göstəriciləri araşdırılıb. Alınan bioaktiv maddələrin antimikrob aktivliyi və funqsid xassələrinin müqayisəli tədqiqi Türkiyənin Muğla Sıtkı Koçman Universitetinin müasir tipli laboratoriyalarında aparılaraq elmi əsaslarla öyrənilib.

Aparılan tədqiqat işlərinin nəticələrinə əsasən Azərbaycana ilk dəfə gətirilərək introduksiya edilən, lakin dünyada geniş şəkildə müxtəlif sahələrdə istifadə olunan etnobotanik, Passiflora L. cinsinə aid olan 4 növ bitkinin bioekoloji və farmakoqnostik tədqiqi nəticəsində kifayət qədər xammal ehtiyatı və tərkibində bioloji fəal maddələr kompleksi olan, yeni dərman preparatlarının hazırlanması baxımından perspektivli hesab edilən, xarici ölkələrdən gətirilən növlər seçilib. Hazırda müxtəlif bioloji və farmakoloji fəallığa malik olan birləşmələrin məqsədyönlü sintezinə üstünlük verilir. Bu baxımdan antifunqal və antimikrob fəallığa malik yeni birləşmələrin sintezi aktuallıq kəsb edir. Bu səbəblə əlaqədar olaraq tərkibində flavanoid olan birləşmələr sintez edilib. Nəticədə ilk dəfə olaraq ölkəmizdə passiflora cinsinə aid bəzi növlərin antimikrob, antifunqal aktivlikləri müasir metodlarla öyrənilib, mikrobioloji və aktiv funqisid təsirli olmaqla antifunqal preparat kimi istifadəsi təklif edilib.