Elm və Təhsil Nazirliyinin akademik Həsən Əliyev adına Coğrafiya İnstitutunun əməkdaşları Fransa və İtaliya coğrafiyaçılarının təşəbbüsü ilə keçirilən beynəlxalq "GeoNight" tədbirində iştirak ediblər.

İnstitutdan "TehsilMedia.az"a bildirilib ki, hər il dünyanın müxtəlif ölkələri eyni gündə coğrafiya naminə bir araya gəlirlər. Azərbaycan coğrafiyaçıları da artıq üçüncü ildir ki, "Qarabağ Azərbaycandır!” şüarı ilə "Geo Night" tədbirinə qoşulurlar.

Təşkilatçılardan biri olan "Fortis Academy” və 8 nömrəli məktəbin coğrafiya müəllimi, "iGeo Azerbaijan Beynəlxalq coğrafiya olimpiadasına hazırlıq” qrant layihəsinin rəhbəri Yaşar Seyidəliyev "GeoNight” ilə bağlı tədbir iştirakçılarına məlumat verib. Dünya coğrafiyaçıları tədbiri Geonight.net internet səhifəsi üzərindən izləyə biliblər.

Coğrafiya İnstitutunun icraçı direktoru dosent Zaur İmrani "Coğrafi elminin müasir problemləri və inkişaf istiqamətləri” mövzusunda çıxış edib.

İnstitutun gənc alimi, kiçik elmi işçi Bəyimxanım Hüseynova isə "Qarabağın turizm-rekreasiya potensialı” mövzusunda məruzə edib.

Tədbirdə, həmçinin Qarabağın təbiəti, landşaftları və turizm potensialı barədə də məruzələr dinlənilib.