Bütün Azərbaycanın danışdığı Cavid ikinci imtahanda daha yüksək nəticə qazanacağını söyləyib


Sumqayıt şəhərində yerləşən Təbiət Elmləri Təmayüllü Gimnaziya şəhərdə yüksək nəticələri ilə fərqlənir. Gimnaziyanın direktoru Nizami Əhmədovdur. Məktəbin bu il 55 məzunu var. Onlardan 50 nəfəri blok imtahanında iştirak edib, 5 nəfəri isə xaricdə təhsil almağa gediblər.
Cavid Nəzərov da Təbiət Elmləri Təmayüllü Gimnaziyanın şagirdidir. O, bütün ixtisas qrupları üzrə 692 bal toplayıb. Cavidin təhsil aldığı sinifdə 13 nəfər qızıl medala namizəddir.
Elə bu baxımdan tehsil.media Cavid Nəzərovdan müsahibə alıb. Həmin müsahibəni təqdim edirik:

1. İmtahana hazırlıq mərhələsi necə keçib?

Düşünürəm ki, mənim üçün imtahana hazırlıq mərhələsi rahat keçib. Bu dövrdə demək olar ki, çox az hallarda çətinliklərlə rastlaşmışam.

2. İkinci imtahanda iştirak edəcəksən?

Bəli, informatika fənnində etdiyim diqqətsizliyi aradan qaldırmaq istəyirəm. Buna görə imtahana qatılıb 696 bal yığmaq məqsədimdir.

3. İmtahan öncəsi ailəniz tərəfindən təzyiqə məruz qalmısınız?

Xeyr, ailəm hər zaman ən böyük dəstəkçimdir. Hətta az bal toplasa idim belə, ruhdan düşməməyimi tövsiyə edirdilər.

4. 700 bal topladığını deyəndən sonra paxıllıq edən oldumu? Bu qədər balı toplamaq asan deyil.


Paxıllıq edən olmayıb. Əksinə ətrafımda olan insanlar bu uğuruma sevinib məni səmimi qəlbdən təbrik ediblər.

5. Təhsilinin növbəti mərhələləri haqqında nə düşünürsən?

İxtisas seçimi zamanı Bakı Ali Neft Məktəbinin Informasiya təhlükəsizliyi ixtisasını seçecəm. Bakalavr mərhələsini bitirdikdən sonra da təhsilimi davam etdirməyi düşünürəm.

6. Ən böyük stimul aldığın insan kimdir?

Ən böyük stimul mənbəyim valideynlərim, əsasən anamdır. O, mənə elm, təhsil və savadın hər şeydən, maddiyyatdan önəmli olduğunu öyrədib.

7. Gələcəkdə özünü harda görürsən?

Gələcəkdə ozümü seçdiyim sahənin peşəkar mütəxəssisi olaraq görürəm.

Sonda, Cavid Nəzərov bu nəticəni əldə etməsində əməyi olan bütün müəllimlərə dərin təşəkkürünü bildirib.



Müxbir: Ülkər Abdurahmanlı;

Operator: Məsumə İmran;

Redaktor: Fəridə Ağaxanlı