"Azərbaycan təhsil sistemi özünü bacarıqlı zənn edən səriştəsiz insanlar tərəfindən idarə olunur. Təhsilin bütün pillələri üzrə son üç il ərzində baş verən pozuntular, geriləmələr, özbaşınalıqlar müstəqilliyimizin ilk qazandığımız ilində belə olmamışdı. Bir neçə gün əvvəl Elm və Təhsil Nazirliyinin dövlət qulluğu imtahanı belə vermədən şəxsi tanışlıq zəmnində şöbə müdiri təyin olunmuş Elnur Əliyev mətbuatı başına yığıb növbəti nağıllarından birini danışıb".

tehsil.media xəbər verir ki, bunları təhsil eksperti Kamran Əsədov sosial şəbəkə hesabında bildirib.

Ekspertin iddiasına görə, nazirlik əməkdaşları bütün gücünü səfərbər edib ki, əhali dövlətdən narazı düşsün, insanlar ictimai sabitliyi pozsunlar: "Elm və Təhsil nazirliyinin şöbə müdiri Elnur Əliyev israrla deyir ki, bəs uşaq bağçalarında sertifikasiya imtahanı olacaq və bir ixtisas profili uyğun olmayanları işdən azad edəcəyik. Birisi şəxsi münasibətlər zəmnində vəzifəyə təyin olunmuş Elnur Əliyevə izah etsin ki, məktəbəqədər təhsil haqqında qanun 2017-ci ildə qəbul edilib və bu qanun qəbul olunandan əvvəl işə qəbul edilənləri siz bu qanunla azad edə bilməzsiniz".

K.Əsədov qeyd edib ki, məktəbəqədər təhsil müəssisələrində pedaqoji işçilərin sayı 15354 olub və onlardan 31,7 faizi ali təhsilli, 0,3 faizi natamam ali təhsilli, 60,7 faizi orta ixtisas təhsilli, 7,3 faizi tam orta təhsillidir: "Düzdür, bu pillədə keyfiyyətin yüksəldilməsinə ehtiyac var. Amma bu qədər insan ən aşağı əməkhaqqı ilə bu işləri görüblər. Sizin kimi birbaşa şöbə müdiri təyin olunmayıblar, aylıq maaşdan əlavə 10 min manat pulu paket şəklində almırlar. Bilirəm bu rəqəmi isbat etmək lazımdır, amma bu mümkün deyil. Şəxsi münasibətlər zəmnində şöbə müdiri təyin olunmuş Elnur Əliyev bilmir ki, 1-5 yaşlı uşaqların cəmi 14 faizi məktəbəqədər təhsillə əhatə olunur".

Ekspert bildirib ki, özəl sektorun payı artırılmalıdır ki, bu az faiz artsın və dövlətin yükü azalsın: "Bunları mikrofon qarşısına çıxaran kimi ancaq asıb-kəsib işdən azad edirlər. Bu insanlar aşağı əməkhaqqı ilə 10 illərdir ki, tərbiyəçi işləyir. İndi tutmusunuz ki, sizi işdən azad edəcəyik. Bu insanlar ola bilsin ki, ibtidai təhsil, məktəbəqədər təhsil üzrə ali təhsil almayıblar, amma onlar azı 10 ildir ki, bu sahədə çalışanlardır. Kifayət qədər böyük təcrübə əldə ediblər. İşdən azad etmək lazım deyil, onların əməyinin stimullaşdırılması lazımdır. Bəli, bağça işçilərinin bilik və təcrübəsinin yüksəldilməsinə ehtiyac var. Amma bunu onları işdən azad edib yeni tərbiyəçilər ilə həll etmək olmaz".

"Bu arada, yeni yaradılacaq agentlikdəki ştatları  dost, tanış, qohumlarınız arasında bölüb bitirə bildiniz? Sizinlə qeyd olunan kateqoriyaya aid olmayan, amma dövlət qulluğu imtahanı verib ehtiyatda gözləylər ümid edə bilər? Yoxsa gedib onlar taksavatlıq eləsinlər?", - deyə Kamran Əsədov əlavə edib.