Övladını məktəbə yola salmaq istəyən valideynlər onlayn məktəb seçimi etməyə başlayıblar. Amma hər il olduğu kimi, bu il də sistemdə problemlər yaranmağa başlayıb. Hətta bununla bağlı sosial şəbəkələrdə kifayət qədər paylaşımlar edilib. Yaşadığı ünvan üzrə qeydiyyatı olmadığı üçün valideyn evinin yaxınlığındakı məktəbi seçə bilmir. Hazırda bir çox insan eyni problemlə üz-üzədir.

 

Elm Və Təhsil Nazirliyinin rəsmi facebook səhifəsindəki paylaşımlara baxıldıqda məktəb seçimi ilə bağlı çox sayda rəy yazıldığı görülür. Əksəriyyət sistemin effektsizliyindən şikayətlənir.

 

Təhsil eksperti Elşən Qafarov bildirib ki, konstitusiyanın 42-ci maddəsində bildirilib ki, "Dövlət hər bir vətəndaşın təhsil almaq hüququnu təmin edir.” İlk növbədə planlı iş getməlidir. Əhalisi sıx yaşayan ərazilərdə 1 il əvvəldən birinci sinfə gedəcək uşaqların siyahısı götürülməlidir. Məktəblərdə şagird yerlərinin sayına baxılmalıdır. Bu yerlərə baxıldıqdan sonra müəllimlərə seçim vermək lazımdır. 

 

Elm və Təhsil naziri Emin Əmrullayev bildirib ki, insanlar yaşadığı ərazi üzrə qeydiyyatdan keçməlidir. Əgər yaşadığı yer üzrə qeydiyyatı yoxdursa, ilk növbədə bu problemi həll etməlidir. Nazirin sözlərinə görə, həll edə bilmədikləri təqdirdə nazirliyə müraciət etsinlər.

 

Görünən odur ki, bu problemi yaşayanların nazirliyin 146 çağrı nömrəsinə zəng etməkdən başqa çıxış yolu yoxdur.