Yaşı 60-dan çox olan müəllimlərin sertifikasiyası məsələsinə aydınlıq gətirilib.

"tehsil.media"ın məlumatına görə, nazirliyin İnsan resursları şöbəsinin müdiri Eşqi Bağırov bildirib ki, 60 yaşı tamam olan müəllimlərin sertifikasiya imtahanlarında iştirakı könüllü xarakter daşıyacaqsa, onlar yalnız istədikləri təqdirdə müəllimlərin işə qəbul imtahanında iştirak edəcəklər:

"Əgər iştirak etsələr, əməkhaqlarında təbii ki, dəyişiklik olacaq. MİQ-də iştirak etməsələr, artım onlara şamil olunmayacaq”, - deyə E.Bağırov qeyd edib.

Nazirlik rəsmisinin sözlərinə görə, sertifikasiya imtahanlarını keçirməkdə məqsəd təhsilverənlərin peşəkarlığını ölçmək, təlimə ehtiyac olub-olmadığını müəyyənləşdirməkdir:

"Hədəfimiz kimisə işdən çıxarmaq deyil. Qanunvericiliyə təklif edilən dəyişiklik qəbul olunarsa, 60 yaş üzəri müəllimlərin sertifikasiyada iştirakı könüllü olacaq. Hazırda məktəblərdə yaşı 60-dan artıq olan 5 mindən çox müəllim işləyir. Təkliflər hələ qəbul edilmədiyindən həmin müəllimlərə də iştirakla bağlı SMS göndəriləcək. Dəyişiklik olsa, məsələyə yenidən baxacağıq”.