“Bu gün Azərbaycanda bəzi telejurnalistlər dilimizi məhv edir”.


TehsilMedia.az xəbər verir ki, bunları azedu.az-a açıqlamasında ADU-nun Azərbaycan dilçiliyi kafedrasının müdiri, professor Adil Babayev deyib:

O qeyd edib ki, bu gün ana dilimizi qoruya bilmirik:

“Dil bir millətin varlığı üçün onun ölkəsindən, mədəniyyətindən, inamından da artıqdır. Dəfələrlə qəzetlərdə məqalələrlə çıxış etmişəm. Onlar xarici sözləri də, öz sözlərimizi nə cür gəldi işlədirlər. Məsələn, reklamlarda “camaşır” sözünü işlədirlər. Türk qardaşlarımız “çamaşır” paltarlara deyirlər. Onlar da səhv deyir, çünki bu söz fars dilində paltaryuyan deməkdir. Yüzlərlə belə misal var ki, türklər sözləri düzgün mənada işlətmirlər, biz də onlardan götürüb, istifadə edirik. Türk dövlətlərinin vahid bir dilə keçməsi yaxşıdır. Bəs, niyə türk qardaş Azərbaycan sözünü işlətmir? Türk qardaşımızın sözləri o vaxt lazımdır ki, ümumtürk dili yaransın. Məşhur türk alimi Murad Adcı demişdi ki, əgər gələcəkdə ortaq türk dili yaransa, 90 faiz o azərbaycan dili materiallarına əsaslanmalıdır. Çünki bizim dilimizdə oğuzların da, səlcuqların da materialları var.

Yenə türk qardaşlarımızın sözüdür, qəbul edirik, bəs digər sözlər niyə işlədilir? “Parklama” sözü əvəzinə “maşın saxlamaq” istifadə oluna bilməzmi? Xarici dillərdən isimi almaq olar, amma feli almaq olmaz. Fellər dildən dilə keçmir.

Azərbaycan Milli Elmlər Akademiyasındakı (AMEA) bəzi institutların yarısını bağladılar. Çox yaxşı etdilər. Akademiyanın heç bir institutu bir ali məktəbin kafedrası ilə müqayisə oluna bilməz. Çünki kafedrada özünə yer tapa bilməyənlər gedib akademiyada işləyirlər. Bu vaxta qədər hələ bir dəfə o Komissiyanın üzvləri bir araya yığılıb müzakirə etməyiblər”.

“Bəs, dilimizi kim qoruyacaq?” sualına gəlincə, dilçi alim qeyd edib:

“Hər biri 300-500 səhifə olmaqla 17 cildlik məqalələr dərc etmişəm. Burada professor, elmlər doktoru dilimizin qorunması haqqında məqalə yazır, amma bunlara dəyər verən yoxdur. İndi bir müğənni bir söz desəydi, onu daha yaxşı müdafiə edərdilər.

Necə ki, bir müğənni Nəsimini təhqir edir, onu müdafiə edirlər. Amma Nəsimi bir janrdır, onu, dilimizi təhqir etmək olmaz. Biz indi ana dilimizi qorumuruq. Necə ki, keçmişdə hər kəs rus dilində danışırdı, bütün ərizələr rus dilində yazılırdı, azərbaycanca yazılanda geri qaytarılırdı, azərbaycanca danışana “çuşka” deyilirdi, indi də avropa və türk sözləri dilimizə daxil olur”.