16 oktyabr 2024-cü il tarixində Mingəçevir Dövlət Universitetində (MDU) “Korrupsiyaya qarşı mübarizənin gücləndirilməsinə dair 2022-2026-cı illər üçün Milli Fəaliyyət Planı” çərçivəsində elmi-praktik seminar keçirilib.

Tədbirdə korrupsiya ilə mübarizənin vacibliyi və bu sahədə maarifləndirmə işlərinin gücləndirilməsi məsələləri müzakirə olunub.

Seminar MDU-nun əsas binasında, 107 nömrəli auditoriyada baş tutub və universitetin Elm və İnnovasiyalar şöbəsinin müdiri Vüqar Mustafayevin moderatorluğu ilə həyata keçirilib.

Tədbirdə universitetin müxtəlif şöbələrindən mütəxəssislər və professorlar iştirak edərək, korrupsiya ilə mübarizə mövzusunda fikir və təkliflərini bölüşüblər.

Universitetin hüquqşünası Polad Atayev edib “Antikorrupsiya davranış modelinin formalaşması” mövzusunda təqdimat edərək, korrupsiyanın qarşısının alınması üçün cəmiyyətin hər bir üzvünün davranış modelinin dəyişdirilməsinin zəruriliyini vurğulayıb.

Daha sonra Elçin Tağıyev, universitetin Rəqəmsal və Layihələrin İdarə olunması şöbəsinin müdiri, “Rəqəmsallaşma istiqamətində bilik və bacarıqların artırılması ilə bağlı maarifləndirmə” mövzusunda çıxış edib, rəqəmsallaşmanın şəffaflığın artırılmasında necə rol oynadığını və bu istiqamətdə atılacaq addımların korrupsiya risklərini minimuma endirəcəyini qeyd edib.Seminar çərçivəsində, MDU-nun Tədris şöbəsinin baş mütəxəssisi Günel Baxşıyeva “Şəffaflığın artırılması məqsədilə təhsil xidmətinin təşkili” mövzusunda geniş təqdimatla çıxış edib, təhsil sistemində şəffaflığın artırılması, eləcə də tələbələr və müəllimlər arasında etibarlı münasibətlərin qurulmasının korrupsiyaya qarşı mübarizədə mühüm addım olduğunu bildirib.

Seminarda həmçinin korrupsiya mövzusunda hazırlanmış videoçarx nümayiş etdirilib. Tədbirin sonunda müzakirələr aparılıb, iştirakçılar korrupsiya ilə mübarizənin effektivliyi və bu sahədə maarifləndirmənin gücləndirilməsi yolları ilə bağlı fikirlərini bölüşüblər.

Mingəçevir Dövlət Universitetinin bu kimi təşəbbüsləri, korrupsiyaya qarşı mübarizə sahəsindəki təcrübələri paylaşmaq və yeni antikorrupsiya modellərinin tətbiqi ilə bağlı maarifləndirmə işlərini genişləndirmək baxımından əhəmiyyətli addımlar atır.