Son illərdə II və III ixtisas qruplarında maksimum nəticə - yəni 700 bal toplamaq demək olar ki, müşahidə olunmur. Əvvəllər nadir də olsa bu qruplarda 700 bal toplayan abituriyentlərə rast gəlinirdi. Lakin artıq bir neçə qəbul ilidir ki, bu nəticəyə imza atan namizəd qeydə alınmır.

II və III ixtisas qruplarında 700 bal toplamaq niyə xəyala çevrilib? Bu hal ixtisas qruplarının məzmun baxımından daha çətin olması ilə bağlıdır, yoxsa həmin qrupları seçən abituriyentlərin ümumi hazırlıq səviyyəsi digər qruplara nisbətən aşağıdır?

Mövzu ilə bağlı sabiq deputat Sona Əliyeva AzEdu.az-a açıqlama verib.

Onun sözlərinə görə II və III qrup fənləri üzrə testlərdə 1-2 bal itirmək ehtimalı yüksəkdir və bu da maksimal nəticəni demək olar ki, mümkünsüz edir

"İlk olaraq qeyd etmək lazımdır ki, bu ixtisas qruplarında testin məzmunu daha çox fərqli bilik və bacarıqların uzlaşmasını tələb edir. Məsələn, III qrupda ədəbiyyat və coğrafiyanın yanaşı olması abituriyentdən həm bədii analiz, həm də məntiqi yaddaş tələb edir. II qrup isə riyazi məntiqlə yanaşı texniki anlayışları da ehtiva edir".

Balın özü göstəricidir, amma nəticənin arxasında duran insan faktorunu da unutmamalıyıq

"Bu fənlər üzrə testlərdə 1-2 bal itirmək ehtimalı yüksəkdir və bu da maksimal nəticəni demək olar ki, mümkünsüz edir. Digər tərəfdən, bu qrupları seçən abituriyentlər arasında hazırlıq səviyyəsi və motivasiya da fərqli ola bilər. Tibb, mühəndislik və İT sahələrinin populyarlaşması nəticəsində I və IV qruplarda rəqabət kəskin şəkildə artıb. həmçinin qeyd elemək lazımdır ki, bu ixtisas qruplarında daha çox dəqiq fənlər olduğu üçün, açıq suallarda belə insan faktoru nəticəyə çox təsir etmir. Bu isə həmin qruplarda daha yüksək nəticələrin əldə olunmasına yol açır. Lakin burada bir məsələ də diqqətdən qaçmamalıdır: balın özü göstəricidir, amma nəticənin arxasında duran insan faktorunu da unutmamalıyıq.

İkinci və üçüncü ixtisas qruplarını seçən gənclərin bilikləri, maraqları və gələcək planları fərqlidir və bu fərqliliklər rəqəmlərlə ölçülə bilməz. Ona görə düşünürəm ki, II və III qruplarda 700 balın olmaması yalnız zəif hazırlıqla deyil, həm də test strukturunun daha kompleks olması, həmçinin humanitar sahədə sualların qiymətləndirilməsində insan faktoru ilə də əlaqda ilə əlaqəlidir".