Azərbaycan xalqının milli varlığını, mənəvi zənginliyini yaşadan ən böyük dəyərlərdən biri ana dili və əlifbasıdır. Tarixin keşməkeşli yollarından keçərək bu günə gələn Azərbaycan dili xalqımızın kimliyinin, bütövlüyünün, azadlıq və müstəqillik uğrunda mübarizəsinin simvoluna çevrilmişdir. Ana dili və Azərbaycan əlifbası günü yalnız bir bayram deyil, həm də xalqımızın dilinə olan sevgisinin, ona sədaqətinin, gələcək nəsillərə bu sərvəti olduğu kimi ötürmək əzminin təntənəsidir. Bu gün dilimizə göstərilən qayğı və diqqət, əlifbamızın müasir inkişafı ümummilli lider Heydər Əliyevin milli-mənəvi irsə verdiyi böyük önəmin parlaq təzahürüdür.

Hər bir xalqın milli varlığını yaşadan, onun köklərini dərinləşdirən ən böyük sərvətdir dil. Azərbaycan xalqı əsrlər boyu öz dilini qorumuş, inkişaf etdirmiş və bu gün onu dövlət dili səviyyəsinə yüksəltmişdir. 1 avqust – Ana dili və Azərbaycan əlifbası günü isə bu müqəddəs dəyərin təntənəsi, xalqımızın dilinə və əlifbasına olan sədaqətinin, sevgisinin simvoludur.

Azərbaycan dilinin dövlət səviyyəsində qorunması və inkişaf etdirilməsi Ulu Öndər Heydər Əliyevin adı ilə sıx bağlıdır. Onun “Milli mənsubiyyətini itirməyən xalq heç vaxt məhv olmur. Bunun əsasında isə ana dilinə sədaqət dayanır” sözləri dilimizin milli varlığımız üçün nə qədər mühüm olduğunu aydın ifadə edir. Heydər Əliyevin təşəbbüsü ilə Azərbaycan dili dövlət dili kimi təsdiq olunmuş, latın qrafikalı əlifbamız bərpa edilərək müstəqilliyimizin, milli dirçəlişimizin rəmzinə çevrilmişdir. Prezident İlham Əliyev də bu siyasəti uğurla davam etdirərək qeyd edir: “Azərbaycan dili bizim milli sərvətimiz, dövlətçiliyimizin əsas sütunudur. Biz ana dilimizi qoruyacaq və inkişaf etdirəcəyik.” Bu gün ölkəmizdə həyata keçirilən dil siyasəti, dövlət proqramları, təhsil və elm sahəsində görülən işlər dilimizin zənginliyinin qorunmasına, gənc nəsillərin saf və düzgün Azərbaycan dilində yetişməsinə xidmət edir.

Ana dili və əlifbamızın qorunması təkcə dövlətin deyil, hər birimizin müqəddəs borcudur. Biz dilimizi nə qədər sevib, ona sahib çıxsaq, milli kimliyimizi, tarixi yaddaşımızı bir o qədər güclü qoruyarıq. Bu günün qeyd olunması da gələcək nəsillərə dilimizin əhəmiyyətini daha dərindən dərk etdirmək, milli-mənəvi dəyərlərimizi yaşatmaq baxımından mühüm əhəmiyyət daşıyır. Azərbaycan xalqı tarix boyunca bir neçə əlifba dəyişiklikləri ilə üzləşmişdir. Ərəb, latın, kiril və yenidən latın qrafikasına keçid prosesi yalnız texniki dəyişiklik deyil, həm də siyasi və mədəni yönümlü bir hadisə olub. Bugünkü texnoloji dövrdə gənclərin əsas ünsiyyət vasitəsi sosial şəbəkələrdir. Azərbaycan dili bu sahədə də yaşamalı, tətbiq olunmalı və sevilməlidir. Bunun üçün bir sıra tədbirlər görülür. Süni intellekt texnologiyalarında Azərbaycan dilinin təmsilçiliyi genişləndirilir, mobil tətbiqlərdə, təhsil platformalarında və internet kontentlərində rəqabətqabiliyyətli dil modelimiz yaradılır.Dilimiz oxuyub anlama bacarığımızın əsas dayanağıdır. Bu bacarıq hər bir insanın təhsilində və şəxsi inkişafında mühüm rol oynayır. Ancaq onun yüksək səviyyədə formalaşması üçün ən əsas şərt ana dilimizi mükəmməl bilmək və düzgün istifadə etməkdir. Dilimiz nə qədər zəngin, ifadə imkanları geniş və düzgün öyrədilərsə, uşaqların və gənclərin mətnləri anlama, təhlil etmə və yaradıcı düşünmə qabiliyyəti bir o qədər güclü inkişaf edəcəkdir.

Oxuyub-anlama bacarığı yalnız məktəb uğurları üçün deyil, biliyə, elmə və milli düşüncəyə açılan geniş bir qapıdır. Ona görə də ana dilimizi sevmək, onu düzgün öyrətmək və inkişaf etdirmək hər bir müəllimin, valideynin və bütövlükdə cəmiyyətimizin əsas vəzifəsidir. Dilimiz sadəcə bir ünsiyyət vasitəsi deyil, vətənimizin səsi, milli ruhumuzun ifadəsidir. Bu dilin qorunması, inkişafı və sevdirilməsi yalnız müəllimlərin və yazıçıların deyil, bütün cəmiyyətin ortaq məsuliyyətidir.

Azərbaycan xalqı bu gün fəxrlə deyir: Ana dilimiz bizim varlığımızdır, milli sərvətimizdir, dövlət müstəqilliyimizin əbədi rəmzidir.

Şəxsi inkişaf üzrə kouç,təlimçi, marker, mentor,

müəllim, “Müasir metodist” layihəsinin metodisti,

yazar, “Özünə Yox De” kitabının müəllifi Nigar Mahi