Övlad tərbiyə etmək valideynin və müəllimin ortaq vəzifəsidir. Bizim əsas işimiz uşaqları şəxsiyyət kimi formalaşdırmaqdır. Lakin bu hər zaman özünü doğrultmur. Sosial şəbəkələrdə uşaq tərbiyəsinə əhəmiyyət verməyən insanlar övladlarından öz məqsədləri üçün istifadə edirlər.

Belə olan halda necə uşaq tərbiyəsindən söhbət gedə bilər? Sabah uşağın həyatında hər hansı bir problem yarandıqda, cəmiyyətdə bir hadisə törətdikdə günah kimdə olacaq?

Uşağın tərbiyəsinə xələl gətirəcək müəllimlər və valideynlər mütləq cəzalandırılmalıdır. Qeyd edək ki, müəllimi günahlandırmaq çox asandır. Amma unutmaq olmaz ki, uşaqlar bizim "malımız" deyil. Elə bəlkə də işə valideynləri cəzalandırmaq və ya maarifləndirməklə başlamalıyıq. Uşaqların saflığından istifadə etmək daha sonra qarşısıalınmaz problemlərə çevrilə bilər.

Münasibət bildirdiyimiz xəbəri sizlərə təqdim edirik:

"Tiktok sosial şəbəkəsində 9 yaşlı övladı Adəmlə canlı yayımlara çıxan və videolar paylaşan Ağcabədi rayonunun Hüsülü kənd sakini Sadiq Mirzəyev barəsində tədbir görülüb.

“Qafqazinfo” xəbər verir ki, bu barədə DİN-in Mətbuat xidmətinin rəisi polis polkovnik-leytenantı Elşad Hacıyev məlumat verib.

O bildirib ki, azyaşlı və yeniyetmələrlə bağlı məsələlərə həssaslıqla yanaşılır: “Ağcabədi rayon Hüsülü kəndində yaşayan azyaşlı Adəmin Tiktok sosial şəbəkəsində atası ilə paylaşdığı neqativ videolarla bağlı tədbirlər görülüb. Övladının təlim-tərbiyəsi ilə ciddi şəkildə məşğul olmayan valideyn barəsində protokol tərtib olunaraq rayon icra hakimiyyətinin müvafiq komissiyasına göndərilib”.

Qeyd edək ki, 9 yaşlı Adəmin atası ilə birgə canlı yayımlar açması, nalayiq ifadələr işlətməsi, gələcək tərbiyəsinə neqativ təsir edə biləcək mövzularla bağlı müzakirələr aparması cəmiyyətdə birmənalı qarşılanmayıb.

Xatırladaq ki, daha əvvəl Adəmin söyüş söydüyü videosunu paylaşan həmkəndlisi Samir Ələsgərov həbs edilib."