Lənkəran Dövlət Universitetinin (LDU) kollektivi hər ilki ənənəsinə sadiq qalaraq 2023/2024-cü tədris ilini də möhtəşəm yay gəzintisi ilə yekunlaşdırıb.

LDU-dan bildirilib ki, universitetin rektoru, professor Natiq İbrahimov başda olmaqla proffesor-müəllim-işçi heyəti Lənkəranın Xanbulançay ərazisində salınmış istirahət məkanlarına səfər edib. Universitet rəhbərliyi və LDU Həmkarlar İttifaqı Komitəsinin birgə təşkilatçılığı, maliyyə dəstəyi ilə ərsəyə gələn gəzintidə kollektivin arzu edən üzvlərinin hamısı iştirak edib.

Talış dağlarının qoynunda salınmış istirahət məkanı öz əsrarəngiz gözəlliyi ilə gəzintiyə qatılanlara gözəl əhval-ruhiyyə, xoş ovqat bəxş edib. Təbiətin bütün gözəlliklərinin vəhdət təşkil etdiyi istirahət guşəsi dağı, dərəsi, meşəsi, gölü, bulağı, ən əsası, saf havası ilə istirahətin dadını çıxartmaq istəyənlərin ürəyincə olub. Kollektivin rahat istirahət etməsi, əylənməsi üçün əlverişli şəraitin olması, cənub mətbəxinin ləziz təamları, bulaq suyundan dəmlənmiş çay, yay meyvələri, növbənöv çərəzlər, əyləncəli oyunar gəzintiyə rəngarənglik, şux ovqat qatıb, gərgin tədris ilinin “yük”ünü atmağa yardımçı olub.