Bakıda fəaliyyət göstərən xüsusi təhsil məktəblərinin müəllimləri Bakı şəhəri üzrə Təhsil İdarəsinin qarşısında aksiya keçirib.

Reportyor.info xəbər verir ki, aksiya ev təhsilinin ləğvinə yönəlik addımlara etiraz məqsədi ilə keçirilib.

Aksiyada 3, 11 və 268 saylı xüsusi təhsil məktəblərinin müəllimləri iştirak edib.

Onlar əməkdaşımızla söhbətində bildirib ki, xüsusi təhsil məktəblərində təhsil alan şagirdlərin diaqnozları dəyişdirilib. “Bu, ev təhsilinin ləğvi üçün atılan addımdır. Elə uşaqlar var ki, onların məktəbdə təhsil alması sadəcə mümkün deyil. Yəni, bu uşaqlar üçün inkluziv təhsil keçərli deyil. Onlar yalnız evdə təhsil almalıdır. Lakin götürüb uşaqların diaqnozlarını dəyişiblər, valideynlərindən xəbərsiz onları reablitasiya mərkəzinə, yaxud xüsusi təhsil məktəbinə yazıblar. Biz də buna etiraz edirik və yalnız biz deyil, valideynlər də etiraz edir”, – deyə müəllimlər bildirib.

Müəllimlərin sözlərinə görə, idarədən valideynlərə bildirilib ki, uşaqlarin diaqnozuna yenidən baxılacaq. “Bizə isə deyiblər ki, saat hesabı dərs verəcəyik. Guya bu günə qədər evdə təhsil qanunsuz olub. Bu bizim üçün qanedici cavab deyil”, – müəllimlər vurğulayıb.