Ümumi təhsil müəssisələrində müəllimlərin peşəkar inkişafını dəstəkləmək və tədrisin keyfiyyətini inkişaf etdirmək məqsədilə həyata keçirilən “Müasir metodist” layihəsi çərçivəsində dərsdinləmə fəaliyyətləri uğurla davam edir. Bu proses müəllimlərin metodiki bilik və bacarıqlarının dəyərləndirilməsi, onların təlim ehtiyaclarının müəyyənləşdirilməsi və pedaqoji təcrübələrinin inkişaf etdirilməsi istiqamətində mühüm bir fəaliyyətdir. Belə ki, 2025-ci ilin yanvar ayında layihə çərçivəsində ümumi təhsil müəssisələrində fəaliyyət göstərən metodistlər tərəfindən həyata keçirilən dərsdinləmələr zamanı müəllimlərin tədris prosesində tətbiq etdikləri tədris metodları, resurslar və dərs planlarının keyfiyyəti müşahidə olunub. Dərsdinləmə prosesindən sonra müəllimlərin fəaliyyətləri təhlil edilib, hər bir müəllimə konstruktiv tövsiyələr verilib, onların metodiki yanaşmalarının təkmilləşdirilməsi üçün yollar təklif olunub. Tədris prosesi strukturlaşdırılmış meyarlar əsasında dəyərləndirilib. Dərsdinləmə prosesi müəllimlərin fəaliyyətini dəyərləndirməklə yanaşı, onların öz pedaqoji təcrübələrini nəzərdən keçirmələri və təkmilləşdirmələri üçün geniş imkan yaradır. Müşahidələr əsasında əldə edilən məlumatlar metodistlər və müəllimlər arasında keçirilən müzakirələrdə geniş təhlil edilir. Bu əməkdaşlıq təhsil prosesinin daha da səmərəli təşkilinə zəmin yaradır.

Qeyd edək ki, “Müasir metodist” layihəsi çərçivəsində həyata keçirilən dərsdinləmələr, müəllimlərin peşəkar inkişafına töhfə verməklə yanaşı, şagirdlərin akademik göstəricilərində nəzərəçarpacaq irəliləyişlər əldə edilməsinə şərait yaradır. Layihə metodiki dəstək vasitəsilə tədris prosesinin keyfiyyətinin artırılmasını təmin edərək ümumi təhsil müəssisələrində müasir pedaqoji yanaşmaların tətbiqini gücləndirir.