17-21 aprel 2025-ci il tarixlərində peşə təhsilinin inkişafı istiqamətində peşə təhsili müəssisələrində kurikulumun tətbiqi, metodiki işlərin təşkili və qiymətləndirmə sahəsində bilik və bacarıqların artırılması məqsədilə təlimlər keçirilib.

TƏHSİL.BİZ xəbər verir ki, təlimlərdə Bakı və regionlardan olan ümumilikdə 12 peşə təhsili müəssisəsinin rəhbər və təhsilverənləri iştirak ediblər.

Təlim proqramı çərçivəsində iştirakçılara səriştə əsaslı təhsil anlayışı, kurikulumun əsas komponentləri və məqsədləri, təlim nəticələri, kreditlər, qiymətləndirmə meyarları və modul yanaşması haqqında geniş izahlar verilib, baza və ixtisas modulları, istehsalat təlimi və təcrübəsinin tətbiqi nümunələrlə göstərilib.

Metodiki işlərin təşkili mövzusunda müəllimlərin liderlik, effektiv kommunikasiya və təşkilatçılıq bacarıqlarınının inkişaf etdirilməsinə xüsusi önəm verilib, illik və gündəlik planlaşdırma, mövzu ardıcıllığı və dərs planlarının hazırlanması ilə bağlı praktiki tövsiyələr təqdim edilib. Eyni zamanda, formativ qiymətləndirmə metodları – əks-əlaqə, qarşılıqlı qiymətləndirmə və digər metodlarla bağlı praktik yanaşmalar izah olunub.

Bu təlim peşə təhsilində keyfiyyətin artırılması, beynəlxalq standartlara uyğun kurikulumların tətbiqi və təhsilin dayanıqlığının təmin olunması baxımından mühüm addım kimi qiymətləndirilir.