Elm və Təhsil Nazirliyinin Radiasiya Problemləri İnstitutunun (RPİ) Elmi şurasının növbəti iclası keçirilib.

Bu barədə "tehsil.media”a institutdan bildirilib.

Giriş sözü ilə çıxış edən institutun baş direktoru, AMEA-nın müxbir üzvü İslam Mustafayev gündəlikdəki məsələləri iclas iştirakçılarının diqqətinə çatdırıb.

İclasda əvvəlcə Azərbaycanın Milli Qəhrəmanı Mübariz İbrahimov adına Biləsuvar Bağça-Məktəb-Lisey Kompleksi ilə anlaşma memorandumu, cari ayın əvvəlində institutda keçirilmiş "Radiasiya texnologiyaları və onların tətbiqləri” adlı konfransın nəticələri və yeni konfransa hazırlıq, həmçinin Azərbaycan Respublikası və Macarıstan hökumətləri arasında iqtisadi əməkdaşlıq üzrə Birgə Komissiyanın 9-cu iclasının Protokolunun təhsil və elm sahəsində əməkdaşlıq bölməsinin müvafiq müddəalarının icrasının təmin edilməsi haqqındakı məsələlərə baxılıb.

Sonra Polimerlər və elektroaktiv materialların radiasiya fizikası laboratoriyasının böyük elmi işçisi, fizika üzrə fəlsəfə doktoru Nəbi Əliyevin dosent elmi adı alması üçün müraciətinə baxılıb, eləcə də Enerjiqəbuledici radiasiya prosesləri laboratoriyasının böyük elmi işçisi, kimya üzrə fəlsəfə doktoru Fətullah Çiçək tərəfindən təqdim olunmuş İonlaşdırıcı şüaların Türkiyə liqnitlərinə təsiri və Nizamsız bərk cismlərin radiasiya fizikası laboratoriyasının aparıcı elmi işçisi vəzifəsini icra edən, fizika elmləri doktoru, dosent Elçin Hüseynov tərəfindən təqdim olunmuş "Neytron-nanohissəcik qarşılıqlı təsiri və 3C-SiC nanokristallarında neytron çevrilmələri” adlı monoqrafiyaların nəşrinə icazə verilməsi məsələsi müzakirə edilib.

İclasda daha sonra Radiasiya Problemləri İnstitutunun Radiobiologiya və Bərpa olunan enerji növlərinin çevrilməsi laboratoriyalarına rəhbər, Layihələndirmə-konstruktor şöbəsinə müdir vəzifələrinə seçki müsabiqəsində iştirak edəcək iddiaçıların sənədlərinə baxış komissiyasının qərarı, əməkdaşların attestasiyasının nəticələri, ezamiyyətlər haqqındakı hesabatlar, əmək intizamının möhkəmləndirilməsi və cari məsələlər ətrafında müzakirələr aparılıb.