Azərbaycan Respublikasının Prezidenti İlham Əliyevin rəhbərliyi altında rəşadətli Azərbaycan Ordusunun 44 günlük Vətən müharibəsindəki şanlı zəfərindən üç il ötməsi və 9 Noyabr - Bayraq Günü münasibətilə əlaqədar olaraq Azərbaycan Tələbə Gənclər Təşkilatları İttifaqı (ATGTİ) və üzv Tələbə Gənclər Təşkilatları tərəfindən silsilə tədbirlər keçirilib.

tehsil.media xəbər verir ki, ATGTİ və Tələbə Gənclər Təşkilatlarının 3000-dən çox fəalı Birinci Fəxri xiyabanda ümummilli lider Heydər Əliyevin və İkinci Fəxri xiyabanda Azərbaycanın müstəqilliyi və ərazi bütövlüyü uğrunda canlarından keçən şəhidlərimizin əziz xatirəsini ehtiram və minnətdarlıqla yad edib.

Azərbaycan Respublikası Gənclər Fondunun dəstəyi, ATGTİ, “İrəli” İB və Tələbə Gənclər Təşkilatlarının birgə təşkilatçılığı ilə “Bayraqdar” layihəsi çərçivəsində gənclər arasında qəhrəman qazi və döyüşçülərimizin tanıdılması məqsədilə görüşlər reallaşdırılıb. Vətən uğrunda canlarını fəda etmiş qəhrəman əsgər və zabitlərin xatirəsinin hörmət və ehtiramla anılması məqsədilə böyük tələbə auditoriyasına malik ali təhsil müəssisələrində görüşlər keçirilib.

Həmçinin Gənclər Fondunun dəstəyi ilə reallaşan layihələr çərçivəsində Vətən müharibəsində qazanılan qələbə və Bayraq Gününün qeyd olunması məqsədilə ali və orta ixtisas təhsili müəssisələrinin Tələbə Gənclər Təşkilatları tərəfindən “Qələbə”, “Müstəqilliyimiz Əbədidir”, “Şəhidlər ölməz, Vətən bölünməz!”, “Heydər Əliyevin şah əsəri: Müstəqil və qalib Azərbaycan” , “Uğura gedən yol”, “Dastana döndü” , “Bayraq günü”, xarici dillərdə müstəqil Azərbaycanın zəfəri haqqında tələbələrin məlumatlandırılması məqsədilə “Victory Day” adlı tədbir, “Qarabağ, sən azadsan!”, “Hərbi qənimətlər parkına ekskursiya”, “Zəfər ekskursiyası”, “Atadan-oğula” adlı dəyirmi masa, “Zəfər Günü” intellektual yarışı və bir çox müxtəlif istiqamətli görüşlər, konfranslar, konsert proqramları və dəyirmi masalar keçirilib.

Eyni zamanda tələbə gənclərin vətənpərvərlik, musiqi, intellektual oyunlar klubları, mədəniyyət klubları və debat klubları şəbəkələrinin təşkilatçılığı ilə silsilə tədbirlər reallaşıb. Vətənpərvərlik klubu tərəfindən “Qələbə rəmzi”, “Bayraq mənliyimdir”, “Unutmadıq, unutmarıq” adlı tədbirlər keçirilib. Mədəniyyət klubları şəbəkəsi tərəfindən müxtəlif videoçarxlar nümayiş etdirilib, şeirlər və vətənpərvərlik fonunda müxtəliflər tədbirlər, “Zəfər Debat turniri” adlı turnir təşkil olunub.

Həmçinin Xarici dillər klubları şəbəkəsi tərəfindən Bakı Slavyan Universitetində xarici və yerli tələbələrin iştirakı ilə Azərbaycan, onun tarixi və əlamətdar günləri haqqında ətraflı məlumatlar çatdırmaq məqsədilə ingilis və rus dillərində “Bayraq günü - Xarici tələbələrin gözündə” adlı tədbir, müəllim və tələbə kollektivinin iştirakı ilə zəfərimizin dünəni, bu günü və gələcəyi haqqında dəyirmi masalar keçirilib. Tarix klubları şəbəkəsi tərəfindən “Əsrin Fatehi” adlı tədbir, Zəfər gününə həsr olunmuş “Zəfər paradı” adlı intellektual yarış olmaqla müxtəlif layihələr reallaşdırılıb.