Gənclər əvvəlki illərlə müqayisədə ali təhsil almaq üçün xarici ölkələrə daha çox üz tutur. Vətəndaşlarımız xarici ölkələrə üz tutsa da, statistika onu göstərir ki, əcnəbilərin Azərbaycan universitetlərində təhsil alma faizi aşağıdır.

Maraqlıdır, əcnəbilərin Azərbaycan univeristetlərinə cəlb olunması üçün hansı addımlar atılmalıdır? Bu mövzuda dövlət və universitetlərin rolu nə qədərdir?
Deputat Ceyhun Məmmədov mövzu ilə əlaqədar AzEdu.az-a açıqlama verib.

Deputat bildirib ki, bu gün Azərbaycanda əcnəbi tələbələrin cəlbi üçün heç bir ciddi addım atılmır: “Faktiki olaraq bu sahədə hər hansısa ciddi işlərin getdiyini söyləyə bilmərik. Bu istiqamətdə universitetlərin öhtəliyinə böyük məsuliyyət düşür. Əsas problemlərdən biri kimi yataqxanaların olmamağını göstərə bilərik. Hələ də bir çox universitetlərin yataqxanası yoxdur”.

C.Məmmədov qeyd edib ki, bir çox universitetlərdə ingilis dilli proqramlar yoxdur: “Universitetlərin rəsmi səhifələrində belə ingiliscə kifayət qədər məlumat rast gəlmirik. Bununla yanaşı xarici dildə kitablar da demək olar ki, yox səviyyəsindədir”.

“Azərbaycanda təhsil alan əcnəbilərin çoxu onlara olan münasibətdən narazıdır”: “Bəzi universitetlərdə təhsil alan əcnəbi tələbələr ayrı-seçkiliyə məruz qaldıqlarını və buna görə də narazı olduqlarını bildirir. Bu kimi problemlərin mövcud olduğu müddətdə hər hansı əcnəbi tələbənin Azərbaycana təhsil almaq üçün gəlməyi gözlənilmir. Gələn gənclərin bir hissəsi ölkələrində müvəffəqiyyət əldə edə bilməyənlərdir”.

Deputatın sözlərinə görə Sovet dövründə təhsil almaq üçün vətəndaşlar ayrı-ayrı ölkələrdən gəlirdi: “Sovet dövründə Azərbaycanın çox böyük potensialı var idi. 10 minlərlə tələbə oxumaq üçün bizim ölkəni seçirdi. İndi isə əlimizdə olan məlumata əsasən Azərbaycan universitetlərində 7000-ə yaxın əcnəbi təhsil alır.

Millət vəkili sözügedən problemlərin həlli yollarına nəzər salıb: “Əcnəbilərin cəlb olunması üçün əvvəlcə dövlət universitetlərinə ciddi tapşırıq və nəzarət olmalı, daha sonra ingilis dilində tədris proqramları işlənməli, yataqxanalar müasir strukturda qurulmalıdır. Xarici vətəndaş dil bilmirsə nəyə görə Azərbaycanca təhsil almalıdır? Xarici vətəndaş universitetin rəsmi saytına daxil olub, orada dərs prosesi, təlim-tədris barədə ingiliscə tam məlumat əldə edə bilmirsə, o, seçim üçün Azərbaycana üz tutmayacaq. Sistemi bu cür qursaq, ölkəmizdə təhsil almağa maraq yarana bilər. Bu məsələlər həll olunmadan əcnəbilərin ölkəmizdə təhsil almağını gözləyə bilmərik. Ölkəmizdə bu sahədə potensial olsa da, lazımi şəkildə istifadə edə bilmirik”.

C.Məmmədov bildirib ki, bu gün tələbələr öz ana dilimizdə dərslik tapa bilmir, nəinki xarici dillərdə tapsın: “Təhsil ən surətli inkişaf edən sahələrdən biridir. Universitet daxilində laboratoriyalar, müasir innovasiyalar, texnologiyalar olmalıdır. Ancaq hələ də tələbələr Azərbaycan dilində mövzunu əhatə edən dərsliklər tapmırlarsa, əcnəbilər burada necə oxusun? İngilis dilini tədris edəcək müəllim bazası yoxdur. Bu istiqamətlərdə hələ ki, irəliləyiş yoxdur. İnanırıq ki, Elm və Təhsil Nazirliyi bu istiqamətlərdə addımlar ataraq prosesə öz tövhəsini verməyə çalışacaq”.