AMEA-nın Nəsimi adına Dilçilik İnstitutunda özbəkistanlı alimlərlə görüş keçirilib.

Bu barədə "TehsilMedia.az" a institutdan bildirilib.

Görüşdə Özbəkistanın Əlişir Nəvai adına Daşkənd Özbək dili və ədəbiyyatı Universitetinin Özbək dilinin tədrisi fakültəsinin dekanı, professor Saodat Muhamedova, fakültənin müəllimi Zilola Hüsayinova və ADPU-nun Müasir Azərbaycan dili kafedrasının müəllimləri iştirak ediblər.

Tədbirdə Dilçilik İnstitutunun baş direktoru, professor Nadir Məmmədli vurğulayıb ki, Özbəkistanın elm ocaqları, akademiyası, universitetləri ilə geniş əlaqələrimiz var. Nadir Məmmədli Azərbaycan özbək dilinə dair tədqiqatlarından, iki ölkə arasında ədəbi əlaqələrin inkişafındakı xidmətlərindən və insani keyfiyyətlərindən danışıb.

Professor bildirib ki institutun Türk dilləri şöbəsinin aparıcı elmi işçiləri tərəfindən özbək dili ilə bağlı dissertasiya, kitablar yazılıb, danışıq kitabçası və lüğətlər çapa hazırlanıb.

Sonda özbək alimləri çıxış edərək bu cür tədbirlərin həyata keçirilməsinin əhəmiyyətindən danışıblar.