Bakı Avrasiya Universitetində "Ümumi filologiya" kafedrasının baş müəllimi Çiçək Hüseynovanın təşkilatçılığı ilə "Aşıq ədəbiyyatı: ənənə və novatorluq" mövzusunda elmi-praktik tədbir keçirilib. 

tehsil.media xəbər verir ki, tədbirdə universitetin professor-müəllim heyəti ilə yanaşı tələbələr də iştirak ediblər.

Əvvəlcə Azərbaycan Respublikasının Dövlət himni səsləndirilib.Daha sonra Vətən müharibəsi şəhidlərinin əziz xatirəsi bir dəqiqəlik sükutla yad edilib.

Tədbiri giriş sözü ilə açan professor Mənsim Məmmədov  "Heydər Əliyev İli” çərçivəsində universitetdə silsilə tədbirlərin keçirildiyini, müasir Azərbaycanın memarı və qurucusu Ulu Öndərin dövlətimizin müstəqilliyi, inkişafı naminə böyük və əvəzedilməz işlər gördüyünü,  xüsusi vurğulayıb.

Tədbirdə folklorşünas alim, aşıq ədəbiyyatımızın toplayıcısı və tədqiqatçısı fil.ü.f.d., dos. İlhamə Qəsəbova, Gədəbəy aşıq mühitinin tanınmış aşıqları Aşıq Nəbi Nağıyev və Aşıq Nazim Quliyev iştirak ediblər. Dos. İlhamə Qəsəbova aşıq sənətinin klassik ənənələrindən, ustad-şəyird  münasibətlərindən, dastanlardan və aşıq havalarının bölgələrə uyğun olaraq ifa edilməsindən geniş məruzə ilə çıxış edib.

Aşıq Nəbi Nağıyev "Valeh və Zərnigar" dastanından bir parça, İlhamə Qəsəbova isə "Aşıq Cəlal və Qaratel" dastanından Cəlalın həyat yoldaşının evdən küsüb getmə səhnəsini canlandırıblar.

Tədbirdə həmçinin filologiya ixtisasının ll kurs tələbəsi Əsmər Orucova sazın müşayiəti ilə Aşıq Alının "Gözlərəm səni" gəraylısını ifa edib.

Sonda tələbələri maraqlandıran suallar cavablandırılıb.