Elm və Təhsil Nazirliyinin Dendrologiya İnstitutu ilə Lənkəran Regional Elmi Mərkəzi (LREM) arasında bağlanmış qarşılıqlı müqaviləyə əsasən Ekologiya və İqlimləşdirmə şöbəsinin müdiri, biologiya üzrə fəlsəfə doktoru Hüseynağa Əsədov, Sənaye əhəmiyyətli bitkilər laboratoriyasının aparıcı elmi işçisi, aqrar elmlər üzrə fəlsəfə doktoru Tofiq Sadiqov, Mərkəzləşmiş eksperimental laboratoriyasının kiçik elmi işçisi Mirməhəmməd Babayev Lənkəran-Astara bölgəsində ekspedisiyada olublar.
AMEA-dan "TehsilMedia.az"a bildirilib ki, alimlərin apardığı ekspedisiyanın əsas məqsədi iqlim dəyişmələri nəticəsində müxtəlif ekoloji amillərin-temperaturun, nisbi rütubətin, su qıtlığı və s. təsiri nəticəsində subtropik bitkilərdən-limon, naringi və portağal növlərində fotosintez prosesinin dinamikası, yarpaqlarda xlorofilin miqdarca dəyişməsi, bitkilərin quraqlığa davamlılığı, yarpaq orqanının su saxlama qabiliyyəti, yeni zoğların və yarpaqların boy və inkişaf dinamikasının, onların məhsuldarlığına və məhsulun keyfiyyət göstəricilərinə təsiri təyin edilib və yeni təkliflər verilib.
Laboratoriya əməkdaşları tərəfindən subtropik bitkilərdən, xüsusilə də, sitrus növlərinin yarpaqlarından efir yağlarının alınması üçün yarpaq nümunələri, hər bir növdən 500 qram olmaqla götürülüb, onları kölgə şəraitində qurudaraq, təyinat aparmaq üçün gətirilib.
Ekspedisiyanın iştirakçıları LREM-də, analitik laboratoriyanın təşkil olunmasında iştirak etmiş, quru çayın alınma texnologiyası ilə tanış olublar.