Son dövrlər Ali təhsilin doktorantura pilləsinə qəbul olmaq istəyənlərin sayı artıb. Bəs sadəcə istəmək bu pilləyə qəbul olmaq üçün kifayətdirmi?
Nazirlər Kabineti "Doktoranturaların yaradılması və doktoranturaya qəbul Qaydaları”nda dəyişiklik edib. Bəs bu dəyişikliklər nədən ibarətdir?
Bu barədə TehsilMedia.az - a müsahibəsində təhsil eksperti İlqar Orucov bildirib ki, bu qaydalar tərtib olunan və dəyişiklik edilən zaman Azərbaycan Milli Elmlər Akademiyası və Elm və Təhsil Nazirliyi ilə razılaşdırılır. Dəyişiklik yalnız beynəlxalq dil sertifikatı ilə bağlıdır. Belə ki, doktoranturaya qəbul zamanı qəbul olmaq istəyən iddiaçılar xarici dildən fəlsəfədən və ixtisas fənnindən ali təhsil pilləsinin magistrartura səviyyəsi yükündə olan tədris proqramları həcmində olan imtahana hazırlaşırlar. Eyni zamanda xarici dildən imtahan verən şəxslərin imtahanları Dövlət İmtahan Mərkəzi tərəfindən keçirilir. Bu imtahanın qiymətləndirilməsi Azərbaycan Milli Elmlər Akedemiyası və Elm və Təhsil Nazirliyi ilə razılaşdırılaraq Dövlət İmtahan Mərkəzi tərəfindən aparılır.
İndiyə qədər xarici dil üzrə imtahanda 6 beynəlxalq dil sertifikatı verilirdisə, artıq 7-ci dil sertifikatı veriləcək.
Təhsil eksperti Elçin Əfəndi isə qeyd edib ki, beynəlxalq sertifikatı olan şəxslər xarici dil imtahanından azaddırlar. Bildirib ki, IELTS, TOEFL, TestDaF, DELF, DALF kimi dil sertifikatları ilə yanaşı, Kembrice School dil sertifikatı da keçərlidir.
Qeyd edək ki, doktoranturaya qəbul olmaq istəyənlər xarici dildən, fəlsəfədən və ixtisas fənnindən imtahan verirlər. Xarici dildən imtahanda iştirak etməyənlər fəlsəfə üzrə imtahana, fəlsəfə üzrə imtahanda iştirak etməyənlər isə ixtisas fənni imtahanına buraxılmırlar.
Ülkər Abdurahmanlı