Bu barədə TehsilMedia.az-a daxil olan şikayətə görə, məktəb 1964-cü ilin sentyabr ayında Göyçay şəhər 1 nömrəli tam orta məktəb adı ilə fəaliyyətə başlayıb. 1991-ci ildə məktəbin adı dəyişdirilərək, Göyçay şəhər 9 № li tam orta məktəb adlandırılıb. Bildirilib ki, Azərbaycanın ən görkəmli pedoqoqları məktəbdə tədrisin keyfiyyətini yüksəltmək üçün böyük səy və peşəkarlıqla çalışıblar. Məktəb fəaliyyət göstərdiyi dövrdə minlərlə müəllim, həkim, mühəndis, alim, ən əsası - əsl insan, Azərbaycan vətəndaşı yetişdirib. 

Məktəb fəaliyyətə başladığı dövrdə 1200 şagird üçün nəzərdə tutulsa da, hazırda məktəbdə 400-ə yaxın şagird təhsil alır, çox böyük potensialı olan məktəbin binası əsaslı təmir edilmədiyindən hazırda dağılma və uçma təhlükəsi altındadır.

 

Qeyd olunub ki, XXI yüz illikdə Göyçay şəhərində fəaliyyət göstərən məktəbin binasının təmirsiz olması və sinif otaqlarının odunla qızdırılması səbəbindən valideynlər övladlarını yaşadıqları ərazidən uzaq, şagird sıxlığı yüksək olan məktəblərə göndərməyə məcbur olublar. Bu isə maddi itkiyə, övladları üçün isə vaxt itkisinə səbəb olur, nəticədə minlərlə şagird təhsildə geriləyir. 

 

Bildirilib ki, valideynlər müntəzam olaraq 9 № li tam orta məktəbin tədris nəticələri ilə maraqlanır. Məktəbin pedoqoji kollektivi bu cür çətin və şəraitsiz məktəbdə fəaliyyət göstərməsinə baxmayaraq, öz təlim və tədris nəticələrinə görə Göyçay rayon məktəbləri içərisində xüsusi yer tutur.  

 

Bu barədə aidiyyatı qurumlara müraciət olunub.

Ümid edirik ki, problem tezliklə həll olunacaq.