Noyabrın 14-də Azərbaycan Respublikası Mədəniyyət Nazirliyinin dəstəyi ilə Dünya Azərbaycanlıları Beynəlxalq Fondunun təşkil etdiyi “İgidlərin sözü” layihəsi çərçivəsində “Xoş gəlmisiniz” ədəbi-musiqili gecə keçiriləcək. Ədəbi-musiqili gecə Zəfər Gününün üçüncü ildönümünə həsr olunacaq. Tədbirdə müharibə veteranları olan şairlər və musiqiçilər çıxış edəcəklər.
TehsilMedia.az xəbər verir ki, layihənin ideya müəllifi şairə, Dünya Azərbaycanlıları Beynəlxalq Fondunun mədəniyyət, sosial və humanitar məsələlər üzrə komitəsinin sədri Nigar Həsənzadədir.
“Əvvəlcə sizin hər birinizi Zəfər Günü münasibətilə təbrik etmək istərdim! Bu, yaşadığı yerdən asılı olmayaraq, hər bir azərbaycanlının taleyini dəyişən gündür. Bu, gələcək nəsillərin taleyini dəyişdirəcək bir Zəfərdir. Bu bayramı qeyd etmək üçün hər kəsi Beynəlxalq Muğam Mərkəzinə dəvət etmək istərdim. 44 günlük Vətən müharibəsi başa çatdıqdan dərhal sonra təsis etdiyim məşhur “İgidlərin sözü” bədii sosial layihəsinin əsl qəhrəmanlarının iştirak edəcəyi bu layihə çərçivəsində Beynəlxalq Muğam Mərkəzində həm iştirakçılar, həm də təşkilatçılar üçün maraqlı tədbir keçiriləcək. Bir çox insanın bildiyi kimi, bu layihə öz sıralarında əsgər şairləri toplayıb. Mənə qardaş olmuş qəhrəman uşaqlar üç il ərzində paytaxtımızın məşhur səhnələrində layihə çərçivəsində çıxış edirlər. Layihə üçün ən təntənəli hadisə 2022-ci ildə Şuşada Vaqif Poeziya Günləri olub. Torpaqlarımızın azadlığı uğrunda vuruşan əsgərlərin dahi Molla Pənah Vaqifin məqbərəsində öz şeirlərini səsləndirdikləri bu festivalın açılışı məhz “İgidlərin sözü” layihəsinə həvalə olunub”, - deyə Nigar Həsənzadə qeyd edib.
Noyabrın 14-də keçiriləcək bayram gecəsində ilk dəfə olaraq sözləri şair Arif Abdullazadənin, musiqisi Azərbaycanın Əməkdar incəsənət xadimi Cavanşir Quliyevin olan “Şəhidlərin andı” mahnısı və Azərbaycanın Əməkdar artisti Lalə Məmmədovanın ifasında sözləri Salam Sarvanın tərcüməsində şairə Nigar Həsənzadənin, musiqisi Xanım İsmayılqızının olan “Xoş gəlmisiniz” mahnısı səslənəcək. Səhnəyə, həmçinin 2022-ci il Beynəlxalq Muğam Festivalının qalibi 13 yaşlı Həzrət Əzizli çıxacaq.
“Bu proqram bu günlərdə paytaxtımızda və bütün ölkədə keçirilən bir çox digər gözəl gecələrdən əsgərlərin “İgidlərin sözü”ndə iştirak etməsi ilə fərqlənir: bu, həm rəssamlar, həm musiqiçilər, həm də şairlərdir. Düşünürəm ki, heç kim laqeyd qalmayacaq. Axı, bu gecə sadəcə ifaçılar deyil, torpaqlarımızı azad etmək üçün bütün sınaqlardan keçənlərin sözləri, səsləri və təəssüratları üzərində qurulur!” - deyə həmsöhbətimiz vurğulayıb.
Musiqili gecə ərəfəsində Azərbaycan Televiziyasının (AzTV) “Döyüşən rəssamlar” layihəsi çərçivəsində Beynəlxalq Muğam Mərkəzinin foyesində Veteran rəssamların əsərləri nümayiş olunacaq.
Tədbirə giriş pulsuzdur.